‘Más Asturias, mejor España’, lema de Foro Asturias Ciudadano de cara a les eleiciones xenerales

Foro Asturias Ciudadano (FAC) yá ta trabayando nel so desembarcu nel Congresu por un adelantu posible de les xenerales. ‘Más Asturias, mejor España’ ye’l lema que va utilizar el partíu d’Álvarez-Cascos pa tratar de ganar les eleiciones.
 
La Comisión Direutiva de FAC aprobó ayeri l’informe d’Isidro Martínez Oblanca pa poner en marcha un Plan de Movilización pa “algamar que Foro Asturias gane les eleiciones y promueva'l cambiu políticu necesariu n'España pa llograr qu'Asturies nun siga apostrada y marxinada”. El coordinador de la campaña sorrayó la importancia de “llevar a les Cortes Xenerales la voz y el votu de los asturianos, ensin condicionamientos nin topes con rellación a otres comunidaes autónomes, de manera que'l gobiernu próximu d'España cuente con Asturies y podamos poner fin a los siete años llargos de marxinación y escaezu del nuesu país”.
 
Según señalen nun comunicáu, pal partíu de Francisco Álvarez-Cascos la importancia d'esta campaña va tar  en dar respuesta a la entruga ‘¿Cómo te gusta España, con Asturias o sin Asturias?’. FAC considera “necesario y crucial pal futuru inmediatu de la rexón que'l gobiernu próximu d'España cuente siempre con Asturies, y d'ehí la necesidá de qu'haya una gran representación parllamentaria que resulte decisiva a la hora de tomar decisiones”. Otra manera, la Comisión Direutiva de FAC aprobó, coles mesmes, la relación d'altes y baxes d'afiliaos al partíu, qu'algama la cifra de 10.965 afiliaos.