‘Democracia real yá’ prepara una manifestación global pal 15 d’ochobre

La plataforma ‘Democracia Real yá’, xerme del movimientu d’indignaos qu’enllenaron les places principales de les ciudaes asturianes, quier celebrar una manifestación a nivel mundial contra’l sistema actual. Ésta va convocase pal 15 d’ochobre.
 
L’apoyu que ta teniendo en tol Estáu y en ciudaes de toda Europa esta iniciativa que dio’l saltu de la rede a la cai el pasáu 15 de mayu, lleva a ‘Democracia real yá’ a plantegar la convocatoria de manifestaciones en tol mundu col mesmu espíritu de la primera: ‘Nun somos mercancía nes manes de políticos y banqueros’. Asina anunciáronlo ayeri dalgunos de los representes del movimientu en Madrid nuna rueda de prensa nel Centru Social Autoxestionáu Tabacalera, que marcaron como fecha pa esa movilización a nivel mundial el 15 d’ochobre.
 
‘Democracia Real yá’ tamién aprovechó la cita pa reclamar la dimisión del conseyeru d’Interior catalán, Felip Puig, pola actuación de los Mossos d’Esquadra nel intentu de desallugu de la Plaça Catalunya del vienres pasáu, y esplicó que’l so oxetivu ye lluchar contra’l capitalismu mercantilista “que convierte a los seres humanos en mercancía”.