Éxitu de la nueche d’Asturies enriba y debaxo l’escenariu

Avanza’l festival y van socediéndose les actuaciones, ente les más importantes la d’ayeri, la “Grand Nuit des Asturies”, que cumplió coles espectatives del entregáu públicu asturianu, y del desixente espectador bretón.

A lo llargo d’estos díes el programa del FIL ta chiscáu d'actuaciones de la delegación asturiana. Asina, por exemplu, la banda de gaites Llacín y el grupu baille Xeitu participaron el domingu pasáu nel gran desfile de les naciones celtes qu’atraviesa Lorient a lo llargo de más de 2 hores. Un día antes, el sábadu, celebróse’l conciertu “Le voix de le Terre” xuntando nel escenariu el directu del discu “Aire” y los grupos Tuenda y Herbamora. Según los sos protagonistes, foi un retu difícil llevar alantre esi espectáculu, yá que los distintos músicos y cantantes teníen que cruzase y xuntase unos con otros, y llegó a ser demasiao abegoso. Con too y con ello, estes autocrítiques paez que seyan más productu de la autodesixencia que del resultáu final, que la xente que lu pudo ver dixo que foi perbonu.

Pero una de les grandes cites del festival llega cuando’l país al que se-y dedica’l festival ocupa n’esclusiva l’escenariu más grande ya importante del FIL, el “Espace Marine”. Ehí tán toles cartes enriba la mesa, y la selección de grupos de la dirección del FIL y la delegación asturiana tien que cumplir les espectatives, y eso pasó ayeri llunes. El Espace Marine ye una carpa descomanada onde entren más de 5.000 persones sentaes, un aforu más que respetable que conviértese nel primer desafiu de la nueche, yá que llenar esi espaciu tan grande coles entraes a 27 y 32 € nun ye cosa fácil. Pero esi primer retu superóse, y primero de qu’entamara Tuenda la carpa taba casi llena.

Tuenda entamó la nueche con un repertoriu cortu d’alredor de 45 minutos, la programación de la nueche obligaba a facelo asina. Ambás peleóse col so francés pa intentar facer entender al públicu d’ónde yera cada cantar, que por otra parte siempre recibe mui bien el son de Tuenda. Bretaña ye un llugar onde lo vocal y la danza son dos pegollos más que fundamentales de la so música tradicional, y ehí Tuenda  ufierta un conciertu qu’encaxa perbien col espitiru bretón. Ayudó tamién a ello les y los miembros de Xeitu, el grupu de baille presente en Lorient, qu'echó de manera espontanea unos bailles y dances enfrente l’escenariu pa completar l’espectáculu.

Hevia foi’l siguiente en xubise al escenariu, esta vegada acompañáu namás pola so hermana, Maria Jose, a les percusiones y una pianista. Un repertoriu tranquilu, onde Jose Ángel usó la xiblata, la gaita llectrónica y la tradicional y que tuvo’l so momentu cimeru cuando, solu, interpretó de manera técnicamente maxistral una versión de la pieza clásica “Asturias” d’Isaac Albéniz. Ehí’l públicu rompió a aplaudir y se llevantó de los sos asientos pa reconoce-y al gaiteru, dalgo emocionáu, la so interpretación.Pesllaba’l programa de la nueche la banda de gaites Llariegu col so espectáculu “100% Directo”. La banda lleva alredor de dos años faciéndo esti espectáculu que xunta la banda con refuerzos como metales, percusiones varies ya instrumentistes convidaos, faciendo un repertoriu con pieces tradicionales arreglaes, composiciones y hasta versiones de pop español y salsa. A Lorient notóse que l’espectáculu llegó bien maduru, dalgo qu’agradeció , por supuestu el públicu asturianu presente, pero tamién un espectador bretón al que yá se-y facía tarde pero qu’aguantó nel so sitiu énte la fuercia y variedá del espectáculu de Llariegu. Kepa Junquera y Héctor Braga fueron dalgunos de los músicos que xubieron al escenariu a ayudar a la banda gaites a rematar la Nueche d’Asturies.

Ayeri cuadró too, colo que salió redondo, y tol mundu quedó satisfechu y contentu de que la música asturiana consiguiera atrayer tantu públicu, y sobre too, a lo cabero de la nueche, convencelu de que ficieren bien en pasar dalgo más de trés hores sitiendo música fecha n’Asturies.