Ámbitu entama una campaña peles redes sociales pa promocionar la lliteratura en llingua asturiana

‘Un mes de llibros’ trátase d’una iniacitiva entamada por Ámbitu pa promocionar la llingua asturiana y fomentar la merca de llibros. Ésta consiste n’ufrir, al traviés de les redes sociales, quince pieces creatives sobre obres del so catálogu.

‘La maleta al agua’, de Berta Piñán, ye’l primer títulu de la llista de llibros que dende güei, y hasta’l 23 d’ochobre, Ámbitu va promocionar de manera diaria. Pa ello, la editorial uviedina presenta una pieza creativa dixital de formatu A-5, de diseñu cuidáu al empar que cenciellu, col que l’usuariu pue conocer la portada de la espublización y una descripción breve de la obra. “Esta aición promocional naz de la necesidá de xenerar, al marxe de la Selmana de les Lletres y de la campaña de Navidá y del Día del Llibru, un eventu na seronda que valga pa promocionar la lliteratura n’asturianu y fomente la compra de llibros, amás del conocimientu y apreciu de les creaciones na nuestra llingua”, espliquen dende Ámbitu.

Les persones que van recibir les pieces creatives de la campaña ‘Un mes de llibros’ son los 5.000 siguidores d’Ámbitu en Facebook y Twitter. Completen el llistáu d’obres d’esta iniciativa ‘El país del silenciu’, de Vanessa Gutiérrez y Beatriz R. Viado; ‘Cosa de tiempu’, de Cristina Muñiz; ‘El Sil que baxaba de la nieve’, de Roberto González-Quevedo; ‘Al dios del llugar’, de Xuan Bello; ‘Camín de Dios’, de Naciu Varillas; ‘Xente tan cerca’, d’Antón García; ‘Intersticios’, d’Henrique G. Facuriella; ‘Singularidá’, de Pablo Texón; ‘Bruxes 2. Paquín va a escuela’, de Francisco Pimiango; l’antoloxía ‘Cuentos pal mes d’agostu’; ‘Hestoria Universal de Paniceiros’, de Xuan Bello; ‘Sangre na braña’, de Roberto González-Quevedo; ‘Bruxes 3. El sombreru de Tila’, de Francisco Pimiango; y ‘Volver’, de Xurde Fernández.