Álvarez Sostres, arguyosu de llograr un escañu pese al “bipartidismu y la opacidá mediática”

Enrique Álvarez Sostres ye’l primer políticu del país en conseguir un escañu nel Congresu con un partíu asturianu. El cabeza de llista de Foro dixo tar arguyosu d’algamalo pese al “bipartidismu y la opacidá mediática”.
 
El voceru de FAC pronuncióse nestos términos na rueda de prensa ofrecida a las 11.15 hores nel Hotel Regente d’Uviéu, cita na que tuvo la compañía de dellos diputaos na Xunta Xeneral y integrantes de la candidatura. El que nun tuvo presente foi’l presidente del partíu, Francisco Álvarez-Cascos.
 
Álvarez Sostres atribuyó los resultaos al puxu del voto útil y a la voluntá de los asturianos de camudar l’escenariu políticu. D’igual forma, treslladó la so norabona al llíder estatal del PP, Mariano Rajoy, anque tamién reseñó qu’Asturies foi l’únicu territoriu onde los populares rexistraron peores resultaos qu’hai trés años. Entrugáu sobre un averamientu posible con el PP nel país, comentó que son momentos de reflexón y análisis de datos y que "el porvenir ta escrito nes estrelles".
 
“Asturies tamién esiste”
 
Na opinión del diputáu de Foro de Ciudadanos, Asturies ganó nunes eleiciones que, pal so partíu, nun suponen un punto de llegada, sinón una continuación na vocación de serviciu a la ciudadanía. Nesi sen, apuntó qu’esta cita coles urnes dexa un escenariu políticu nuevu pal país. "Ye’l momento de glayar Asturies tamién esiste", manifestó. Por último, na so intervención, Álvarez Sostres ratificó’l compromisu de Foro de llevar la voz d’Asturies onde se tomen les decisiones y d’apoyar la sostenibilidá del Estáu frente a los nacionalismos.