Álvarez-Cascos va decidir sobre’l presupuestu tres conocer les llinies d'actuación del Gobiernu estatal

El presidente d’Asturies, Francisco Álvarez-Cascos, anunció que nun va decidir sobre’l presupuestu pal 2012 hasta conocer les llinies d’actuación del Gobiernu estatal entrante. D’esta forma busca que les cuentes “sían lo más realistes posibles”.
 
Álvarez-Cascos, que fixo esta declaración nel marcu del Fórum 'El Comercio' nel Hotel Tryp d'Uviéu, onde impartió la conferencia 'Los retos de Asturias' y retrucó entrugues de los asistentes, avanzó asina qu’hasta depués del 20-P nun va presentar proyeutu de presupuestos o prórroga presupuestaria. Amás, reprochó al Gobiernu socialista que nun los presentara o apostara pola prórroga de los estatales pal 2012, dalgo que considera "una situación insólita na historia de la Democracia española".
 
El líder de FAC tamién se refirió a "la necesidá" d'abordar la contención del gastu públicu pa poder rebaxar la presión fiscal cola supresión del céntimu sanitariu, del impuestu de sucesiones o la equiparación a les comunidaes llenderes no relativo al impuestu de tresmisiones. Per otra parte, Álvarez-Cascos anunció que va presentar una iniciativa parllamentaria na Xunta Xeneral "de forma inminente" que copia de forma lliteral una proposición de Llei presentada pol PP hai menos d'un añu nel Congresu de los Diputaos pal cambiu de la Llei Xeneral de Comunicación Audiovisual col propósitu de que les comunidaes autónomes tengan llibertá pa decidir sobre la xestión, direuta o indireuta, de les sos televisiones públiques. El presidente adelantó esta propuesta pa "esclarar" el debate sobre l'ente públicu de comunicación RTPA y repitió que'l Gobiernu que preside ta faciendo "lo comprometío" nel so programa electoral.
 
Asina, sobre la decisión del Conseyu de Gobiernu d'aprobar una reducción de 11,3 millones nes sos tresferencies a la RTPA, Álvarez-Cascos defendió que l'Executivu que preside nun pretende'l zarru del ente públicu de comunicación, sinón que s'abra "camín a fórmules alternatives" que nun sían "la xestión direuta con recursos públicos". Por ello, considera oportuno llevar a la Xunta Xeneral una iniciativa igual a la presentada pol PP nel Congresu y a la que FAC "nun va cambiar nin una coma del testu orixinal". "Espero que l'aprueben los mesmos que presentaron esto nel Congresu", dixo, pa depués afirmar que, de lo contrario, nun sabría si los diputaos asturianos del PP s'autoesclúin del partíu o consideren qu'Asturies tien de tar fuera d'España.
 
De la mesma manera, aprovechó pa repitir la esistencia d'un "entente cordial" ente'l PSOE y PP n'Asturies, que diz, volvió a evidenciase al presentar los trés grupos de la oposición una proposición de Llei pa recuperar el control parllamentariu sobre les decisiones económiques y relatives al sector públicu llevaes a cabu pol Gobiernu d'Asturies y que va anular l'acuerdu del Conseyu de Gobiernu del 4 d'ochobre nel que s'incluyíen les retenciones de creitu a la RTPA. P’Álvarez-Cascos, la oposición pretende "cambiar la llegalidá qu'ellos mesmos sosteníen antes" pa que "nun puedan entamase les aiciones de Gobiernu", lo que, según él, demuestra l'anormalidá política que "vive Asturies dende hai años".