Álvarez-Cascos señala que FAC quier ser “un contrapesu” frente a la presión de los nacionalistes

|
Francisco Álvarez-Cascos, nuna entrevista concedida a Telecinco, señaló que FAC, cola so candidatura en Madrid, quier ser “un contrapesu” frente a la presión de los nacionalistes. Tamién amosó’l so apoyu a Mariano Rajoy.
 
Amás de velar polos intereses d'Asturies, el presidente caltuvo nesta entrevista televisada pa tol Estáu que'l so partíu “tien un compromisu superior con España”. Por ello, xustifica la candidatura de Foro Asturias Ciudadano (FAC) por Madrid pola so intención de “ser un contrapesu na gran política española” frente a la presión de los nacionalistes. Nesi sen, añadió que “ye compatible la defensa de los intereses rexonales y los nacionales” y aseguró que “Foro Asturias Ciudadano pretende ser un elementu enriquecedor y positivu pa la política ‘nacional’”.
 
Por esti motivu, volvió a insistir en que va dar el so apoyu al candidatu del PP, Mariano Rajoy, “sin cuotes nin peaxes” nel casu de que lu precise tres les eleiciones xenerales, al entender que los españoles reclamen un cambiu tres “un Gobiernu socialista que foi negativu pal desarrollu d'España”. “L'interés ‘nacional’, nestos momentos, ta perriba de criterios partidistes”, añadió’l presidente d’Asturies.
 
A la pregunta de si FAC yá tien cabeza de cartel en Madrid, Álvarez-Cascos dixo qu'enantes hai que superar la torga llegal de recoyer 5.000 firmes d'avales na Comunidad pa poder presentar candidatu. “Mentes nun superemos esti procesu nun vamos dar el pasu siguiente”, sentenció. Sobre les noticies que tán saliendo sobre’l nomamientu de les candidatures del PSOE a les eleiciones, el presidente de FAC manifestó la so “sorpresa” poles intenciones socialistes de d'integrar nes sos quinieles como cabeza de llista al Senáu o al Congresu al ex presidente d'Asturies, Vicente Álvarez Areces. El llíder de FAC caltién que Rubalcaba nun paez mui coherente al esixir per un llau una estabilidá presupuestaria y, per otru, premiando al presidente que dexó’l país con un déficit que supera l'autorizáu.
Contador Estadistiques