Álvarez-Cascos gana les eleiciones n’Asturies al algamar 16 diputaos

La entrada de Foro Asturias Ciudadano (FAC) a la escena política asturiana ruempe’l repartu tradicional de la Xunta Xeneral. Francisco Álvarez-Cascos gana les eleiciones y abre la posibilidá de que la derecha torne a gobernar Asturies.
 
“FAC ganó les eleiciones”, aseguró Pelayo Roces venti minutos enantes de la medianueche cuando’l recuentu de votos taba cerca de llegar al so fin y había un empate ente’l partíu d’Álvarez-Cascos y la FSA-PSOE. Cristina Coto, tamién na llista de FAC a la Xunta Xeneral, yá lo anunciara tres el pieslle de los colexos eleutorales y tovía nun s’aniciara’l recuentu.
 
Francisco Álvarez-Cascos consiguió al final 16 diputaos, por 15 de la FSA-PSOE pese a qu’estos sacaron 156 votos más. La clave tuvo nos resultaos escelentes de FAC na circunscripción central, onde la formación de nueva creación tuvo 9.088 votos más que los socialistes. El Partido Popular (PP), que se presentaba con una desconocida Isabel Pérez-Espinosa, tuvo que conformase con 10 diputaos, lo que supón la perda la metá de los algamaos nel 2007. Mentes, Izquierda Xunida-Los Verdes d’Asturies (IX-LV) meyoraron los resultaos d’hai cuatro años, cuando foron en coalición con Bloque por Asturies, anque siguen colos mesmos cuatros escaños.
 
No que respeuta a les formaciones asturianistes, los meyores resultaos foron pa Bloque por Asturies-UNA, sétima fuercia más votada per detrás de UPyD y Ideas, con 6.160 votos, lo que suponen un 1,03 por cientu del total. Mentes, Unión URAS-PAS firmó’l so peor resultáu de la historia al sumar 2.948 votos (0,49 por cientu), 10.366 menos que nel 2007. Conceyu Abiertu quedóse nos 1.529 votos (0,26 por cientu), lo que tamién supón una mengua si tomamos como referencia los rexistros d’Andecha Astur d’hai cuatro años: 2.770 votos.
 
No que respeuta a los conceyos, lo más destacao ye la posibilidá de que’l PSOE pierda Xixón tres 32 años de gobiernu municipal si FAC y PP pauten, xunto colos resultaos d’Uviéu, onde torna a ganar el PP, pero esta vez ensin mayoría absoluta. Pilar Varela va poder repetir como alcaldesa del PSOE n’Avilés, pero los ‘socialistes’ pierden Mieres, que pasa a manes d’IX-LV, formación que gana en Ḷḷena con mayoría absoluta.
 
No que respeuta a les fuercies asturianistes, Bloque por Asturies mantién el conceyal de Carreño y gana ún en Ḷḷena ensin necesidá de dir en coalición con IX-LV. En Nava, Asturianistes por Nava, formación baxo la marca eleutoral ‘Compromiso por Asturies’, consiguió ún más que nel 2007 pa sumar tres. Mentes, Conceyu Abiertu por Noreña algama un conceyal y Agrupación Morciniega Independiente (AMI), otru en Morcín. Otros asturianistes con presencia municipal van ser l’empresariu Inaciu Iglesias, por FAC en Noreña, y l’escritor y cantautor Carlos Rubierta, númberu 5 de la llista de FAC por Xixón.