Álvarez-Cascos califica de “moción de censura destructiva” la postura de PP y PSOE colos presupuestos

El presidente del país calificó de “moción de censura destructiva” que PP y PSOE xuntaren los sos votos pa valtar el proyeutu de presupuestos de FAC. “Vamos siguir alantre col compromisu de cambiu”, confirmó Fracisco Álvarez-Cascos.

 Según señaló nuna declaración que lleó na sede de Presidencia, lo asocedío confirma que'l PP y el PSOE "quieren que too siga igual na política asturianu, a pesar del cambiu que los asturianos decidieron el pasáu mes de mayu". Con too y con eso, dixo que FAC va siguir alantre "col compromisu de cambiu" y que van continuar llamando a les coses "pol so nome". D’igual forma, anunció que'l Conseyu de Gobiernu va estudiar nos próximos díes "l'algame del acuerdu aprobáu güei por PP y PSOE, y les consecuencies del escenariu de los presupuestos xenerales d'Asturies prorrogaos".

Álvarez-Cascos afirmó que lo asocedío na Xunta Xeneral foi la "confirmación suprema" de la "entente cordial insólita" que PP y PSOE mantienen dende va años nel país, y que "se reforzó a lo llargo de los siete meses de la llexislatura actual". Asina, acusó al PP de resucitar el "arecismu", en referencia al presidente anterior, Vicente Álvarez Areces. "Tán en xuegu los intereses d’un millón d’asturianos, y n’especial de los más desfavorecío, onde s’inclúin los 90.000 paraos que, más qu’una cifra estadística alarmante, constitúi un drama humanu, tanto personal como familiar", recordó’l llíder de FAC.