Álvarez-Cascos asegura que los recortes na RTPA van crear emplegu nel sector audiovisual asturianu

Francisco Álvarez-Cascos aseguró que los recortes na RTPA "nun son pa suprimir emplegu, sinón pa dexar al sector audiovisual que recupere la senda del emplegu". UXT impugnó la decisión del Gobiernu ante'l TSXA.

"Van favorecer la estabilidá" del sector audiovisual n'Asturies, señaló'l llider de FAC en rellación a los recortes na RTPA, dao que, na so opinión, "cola creación de la televisión pública sustituyóse la economía competitiva polos depredadores voraces del presupuestu públicu". "Pa eso s'adopten estes decisiones, pa entrar na senda del crecimientu y empezar a crear emplegu", añadió darréu'l presidente del país, qu'esplicó que "pola retirada de subvenciones, el sector mineru perdió más de 9.000 emplegos n'Asturies; por retirada d'ayudes fiscales, pierde emplegu'l sector naval; y esto ye una realidá na Asturies que tuvo monopolizada por Gobiernos d'otros partíos". Por estos motivos, Álvarez-Cascos dixo sentise "sorprendíu" ante les crítiques d'esos partíos poles decisiones adoptaes por esti Gobiernu nuevu.  

D'igual forma, resaltó que "cola creación de la Radio Televisión del Principáu, lo que se produxo n'Asturies foi'l zarru de Telegijón, el zarru de Teleasturias; foi'l desgaste de la televisión de les Cuenques, la d'Uviéu y de munchos productores". Asina, nos últimos años, según Álvarez-Cascos, "la iniciativa de la RTPA perxudicó'l desarrollu del sector audiovisual asturianu y espero qu'en poco tiempu puedan notase los efeutos positivos pa tratar de rellanzar esti sector que, col monocultivu públicu, zarró les posibilidaes d'empreses privaes competitives".
 
UXT impugna la decisión del Gobiernu ante'l Tribunal Superior de Xusticia d'Asturies

La Federación de Servicios d'UXT presentó un contencioso-alministrativu ante'l Tribunal Superior de Xusticia d'Asturies impugnando l'acuerdu de Gobiernu d'Asutries del 4 d'ochobre del 2011 pol que s'acuerda la restricción de creitu a la RTPA por valor de 11,3 millones d'euros pal exerciciu d'esti añu. El sindicatu considera "una auténtica irresponsabilidá" aplicar esti recorte a unos presupuestos, aprobaos y conseñaos, de los que depende l'emplegu de más de 800 trabayadores: "300 d'ellos nun percibieron a día de güei'l so salariu del mes de setiembre, rexistrándose dellos casos de compañeros que lleven sin cobrar hasta trés meses", destaquen.

Amás, informen que la Federación de Servicios d'UXT tien solicitada dende'l pasáu 3 d'ochobre una xunta col Conseyeru de Facienda y Sector Públicu, Ramón del Riego, al envís de solicitar les oportunes esplicaciones sobre estes midíes de recorte, "sin qu'hasta'l momentu recibiera respuesta dalguna", polo qu'apura al Gobiernu "a reconsiderar la so decisión, reponiendo otra vuelta los creitos necesarios pal normal funcionamientu de la RTPA y los productores que-y empresten el so serviciu".

Otra manera, el direutor xeneral de la RTPA, Juan José Guerenabarrena, señaló güei que ve "más cerca que lloñe" el "puntu final" del ente públicu si nes selmanes próximes nun s'ufierta una solución al impagu que según aseguró sufre dende agostu'l mediu de comunicación y que torga abonar los salarios de los sos trabayadores.