Álvarez-Cascos asegura que la encuesta del CIS ye un “fraude”

Francisco Álvarez-Cascos, candidatu de Foro Asturias Ciudadano (FAC), criticó la encuesta preelectoral que’l Centru d’Investigaciones Sociolóxiques (CSI) dio a conocer esti xueves al nun apaecer nella nel apartáu nel que s’entrugaba pol conocimientu y valoración de los candidatos principales a la presidencia del país. Nuna entrevista na Cadena COPE, el ex ministru de Fomentu calificó de “fraude” el sondéu.

“El resultáu ye milagrosu. Lo raro ye que nos den siete diputaos”, bromeó Álvarez-Cascos, que tien la opinión de que’l CIS lu sacó de la encuesta. El llíder de FAC aseguró qu’esti sondéu ellabórose “como si fora un encargu de José Blanco, pero col dineru de todos los españoles, polo que se tendrán que derivar responsabilidaes públiques nel so momentu”.
 
El candidatu a la presidencia considera que’l PSOE “ta intentando forzar el votu útil contra Foro Asturias” y que por ello “cocinó” la encuesta del CIS. Nesi sondéu, les persones encargaes d’ellaborar les preguntes entrugaron por Javier Fernández (PSOE), Isabel Pérez-Espinosa (PP), Jesús Iglesias (IX-LV), Rafael Palacios (Bloque por Asturies-UNA) y Ignacio Prendes (UPyD).