Álvarez-Cascos amenaza con tomar midíes llegales si Rajoy mantién unos recortes “inasumibles” p’Asturies

Los recortes anunciaos pol Gobiernu estatal nun convencen al presidente del país. Francisco Álvarez-Cascos calificólos de “inasumibles” p’Asturies y amenazó con tomar midíes llegales nel casu de que se mantengan.
 
Nuna entrevista n’ABC Punto Radio, el llíder de FAC indicó que les midíes del Gobiernu de Rajoy treslladen una "carga desproporcionadamente mayor sobre’l llombu" d’Asturies. "Espero que’l sentíu común y la responsabilidá ayuden a reconducir esti primer recorte presupuestariu col que nos sobresaltamos los asturianos", añadió. El presidente del país confirmó que, en primer llugar, va comparecer na Xunta Xeneral pa, "dende’l diálogu parllamentariu", intentar plantegar una alternativa énte’l Gobiernu estatal. D’igual forma, Álvarez-Cascos reclamó reuniones colos ministros involucraos nos recortes, ente los que citó a la ministra de Fomentu, Ana Pastor; al titular de Facienda, Cristóbal Montoro; y al encargáu d’Industria, Enerxía y Turismu, José Manuel Soria.
 
"Si esto nun se reconduz, una vegada que se conozan los detalles y la so aplicación, creo qu’hai base suficiente pa plantegar midíes del tipu llegal. Nun ye posible que se vulneren los principios de la financiación autonómica; que se vulneren los principios que regulen el mandatu del Gobiernu pa dirixir la correición de los desequilibrios territoriales. Creo que too ello, nel marcu de la normativa europea, abre un abanicu de posibilidaes de defensa de los intereses en términos non yá políticos, sinón en términos xurídicos", alvirtió. A pesar d’ello, espresó’l so deséu en que l’asuntu se resuelva en "clave política". "Traducíos a datos reales, sitúen el recorte p’Asturies en más de mil millones d’euros", aseguró.
 
Por último, Álvarez-Cascos reclamó que’l Gobiernu de Rajoy faiga compatible la solidaridá territorial con un repartu de la carga que nun produza la so rotura y "contribuya a correxir los desequlibrios".