Álvarez Areces defende a Migoya y asegura que “nunca hubo voluntá de tapecer” el ‘Casu Marea’

L’actuación d’Ana Rosa Migoya foi “exemplar” tres detectar les irregularidaes qu’investiga’l ‘Casu Marea’, n’opinión de Vicente Álvarez Areces. L’ex presidente del país afirmó que “nunca hubo voluntá de tapacer” la corrupción n’Alministración.

L’agora senador pola FSA-PSOE compareció güei na segunda xornada de la Comisión Parllamentaria qu’investiga’l casu supuestu de corrupción n’Alministración qu’afeuta a dellos cargos altos del Executivu d’Álvarez Areces. Al contrario de lo asocedío ayeri con José Luis Iglesias Riopedre, María Jesús Otero y Marta Renedo, l’ex presidente sí accedió a responder a les entruges de los representantes de los cinco grupos parllamentarios na Xunta Xeneral. Dixo sentise “arguyosu” de la xestión del so Gobiernu y defendió tanto a Migoya como a Riopedre, ésti últimu en llibertá baxo fianza. Nel casu de la ex conseyera, imputada recién pol xuez responsable de la instrucción del ‘Casu Marea’, señaló que la so actuación foi “exemplar” tres dectar les irregularidaes supuestes cometíes pola funcionaria Renedo, de la que yera superiora. Mentes, sobre l’ex responsable de Sanidá, afirmó que la so dimisión foi por razones de salú y que, inclusive, Riopedre presentó un certificáu médicu pa demostralo. Tamién señaló que nel so Executivu “nunca hubo voluntá de tapecer” el ‘Casu Marea’.

La que decidió nun responder les preguntes de la comisión foi Migoya. La socialista lleó un discursu nel qu’afirmó tener la conciencia tranquila y dixo sentise indefensa. D’igual forma, defendióse señalando que foi ella la que denunció y apartó del serviciu a Renedo. Otra intervención destacada d’esta mañana foi la de Jaime Rabanal, que sí respondió a les entrugues plantegaes. L’ex conseyeru declaró que nun recibiera regalu nengún d’empreses y que los controles n’Alministración yeren los afayadizos. El martes próximu va continuar la Comisión Parllamentaria con una sesión nueva.

La Pita torna a l’aición

La presencia de Vicente Álvarez Areces na Xunta Xeneral pa comparecer na comisión llevó a un grupu de militantes de la Xunta pola Defensa de la Llingua Asturiana y Xunta Moza encabezáu por La Pita a concentrase frente al edificiu a les 9 la mañana. Esti personaxe, símbolu yá de la reivindicación llingüística, portó una pancarta cola frase ‘Les perres de la oficialidá, nos bolsos de la F$A’. Los manifestantes tamién mostraron fotocopies de billetes de 500 cola cara del ex presidente del país, qu’acudió una hora enantes de los previsto a la Xunta Xeneral.