Ábrese la convocatoria del X Concursu de Cuentos Curtios del Conceyu de Cangas del Narcea

El Conceyu de Cangas del Narcea ta acabante d’abrir la convocatoria del X Concursu de Cuentos Curtios, destináu a mayores de 16 años. Toles persones interesaes en participar tienen hasta’l 10 d’avientu pa presentar les sos obres.

El concursu, como asocede dende’l so entamu, ta dividíu en dos estayes: asturianu occidental y asturianu estándar. Por esti motivu, va contar con dos ganadores, que van llevase 400 euros de premiu caún. Según marquen les bases del certame lliterariu, los trabayos presentaos han de ser inéditos, con una estensión mínima de cinco fueyes y máxima de venti, en formatu DIN-A4 y a espaciu doble. La temática ye llibre.

Los cuentos han d’unviase, por cuadriplicao, yá sía per corréu certificáu o de manera presencia, a la direición del Serviciu de Normalización Ḷḷingüística: La Plaza la Oliva, s/n, 33800, Cangas de Narcea. Les copies han de tar dientro d’un sobre ensin remite o baxo nomatu xunto con una plica colos datos reales. Un xuráu formáu por Mónica Rodríguez Riesgo, responsable del serviciu de normalización llocal; representantes de la Conceyalía de Cultura; un miembru de la Rede de Normalización L.lingüística nos Conceyos; y dellos maestros y escritores de Llingua Asturiana, va decidir los ganadores de les dos estayes del concursu. Los vencederos de la edición pasada foron Marisa López Diz, con ‘Arrecendor d’Azahar’ (asturianu occidental), y Pablo Rodríguez Medina, con ‘Estraños conocíos’ (asturianu estándar).