“Tronar de tambores” nuevu llanzamientu discográficu pal Tambor de l’Abadía

El Tambor de l'Abadía vuelve a sonar. El grupu de percusiones qu'encabeza'l tamboriteru Manolo Durán asoleyó esta selmana'l so segundu discu "Tronar de Tambores".

Formáu nel añu 1994 gracies a la iniciativa del percusionista Manolo Durán, el grupu de tambores "El Tambor de l'Abadía" nació como un intentu de que la figura del percusionista garrare otra vuelta'l protagonismu que tuviere nel pasáu nun momentu en que la figura del gaiteru yera claramente predominante nes particulares "rellaciones de pareya" ente gaita y tambor. Precisamente por ello'l grupu garró'l nome del más famosu tamboriteru asturianu de la historia, José Sánchez "El Tambor de l'Abadía" tamboriteru de la parroquia de l'Abadía Cenero de Xixón que foi compañeru musical del tamién famosísimu "gaiteru Lliberdón".

Ocho años dempués del so primer trabayu, "El tambor de l'Abadía" presenta agora nesti trabayu acabante asoleyar pola casa Fonoastur un estudiu musical que quier ser, al traviés de los diez temes musicales qu'enxerta, un recorríu pela evolución del instrumentu estrella del grupu dende les formes tradicionales de tambor hasta los tambores modernos que gasten les bandes de gaites. Como complementu didácticu a lo que ye'l soporte musical, el cartafueyu qu'acompaña al discu inclúi tamién bien d'información sobre la historia del tambor y completes fiches biográfico-musicales de dos famosos tamboriteros a los que se fai homenaxe, el mesmu "Tambor de l'Abadía" y el llangreanu José Rodríguez "Josepán".

Esti "tronar de tambores" llega por fin a les tiendes de discos dempués d'un abegosu procesu de producción que tuvo'l trabayu paralizáu dos llargos años dende que se grabaren les pieces orixinalmente nel añu 2003. Amás de los músicos del Tambor de l'Abadía, nel discu collaboraron tamién músicos de la categoría de Julio Sánchez-Andrade y Javier de Coupaud o la Banda de Música de Xixón ente otros. El grupu tien previsto facer una presentación oficial del discu'l día 7 d'avientu en Club Prensa Asturiana d'Uviéu.