“Miraes 2006” lo meyor de los fotógrafos de prensa asturianos

Yá pue visitase en Palaciu del Conde Toreno d'Uviéu la esposición "Miraes 2006" que fai estoyu del llabor de los fotógrafos de prensa asturianos nel añu. Son 87 semeyes entesacaes del trabayu 29 miembros de l'Asociación de Fotoperiodistes Asturianos.

L'oxetivu de la esposición, que cuenta col patrociniu de la Conseyería de Cultura del Gobiernu asturianu, ye'l de poder sacar del caxón una bona riestra de semeyes que, d'otra manera nunca diben poder vese y que faen un bon repás de los acontecimientos más importantes del añu. El criteriu pol que se mandaron n'Asociación Profesional pa facer la esposición foi que cada sociu presentare cuatro semeyes de les que s'esbillaron les trés meyores, anque'l reconocimientu especial del añu foi pal reporteru gráficu Armando Álvarez, del diariu La Voz de Asturias, ganador del I Concursu Memorial Ramón González.

Dempués del éxitu que tuvo la primer edición de "Miraes" nel 2005, l'Asociación cuenta con llevar la esposición del 2006 per delles ciudaes asturianes.