El Bloque pide’l fin de la represión n'Hondures

El Bloque pide’l cese de la violencia y la represión contra miembros y grupos del Movimientu Unificáu Llabrador del Aguán y del Movimientu Llabrador del Aguán, n’Hondures.

Nos últimos tres díes, según indiquen, esistieron movilizaciones masives de tropes militares a la zona del baxu Aguán, polo que'l Bloque por Asturies espresa la so más fonda medrana énte les posibles acciones de represión y desallugos forzaos contra grupos llabradores. “Nestos momentos yá s'ocupó militarmente la contorna de la comunidá Guadalupe Carney”, apunten.

El Bloque denuncia que dende'l mes de xineru de 2010, ocho miembros del MUCA perdieron les sos vides, polo que la organización esixe que se d'a conocer l'estáu procesal de les investigaciones de los fechos.

Nesti sentíu, “énte la impunidá de la que gociaron hasta'l momentu los perpetradores de les violaciones a los derechos humanos, cometíos n'Hondures dende'l Golpe d'Estáu del 28 de xunu de 2009, ente la situación d'indefensión na cual atópase la ciudadanía que sigue esixendo la torna a un estáu de derechu col plenu funcionamientu de les garantíes indispensables pa la vida en democracia, y ante la creciente violencia contra'l movimientu llabrador, periodistes independientes y los defensores de derechos humanos que sofiten una resolución xusta del problema agrariu nel Baxu Aguán”, el Bloque por Asturies fai un llamamientu a una solución duradera y nun violenta del conflictu, respetuosa colos derechos de les persones y qu'evite más violencia y muertes.

El Bloque por Asturies solicita a la Comisión Interamericana de Derechos Humanos, nel marcu de la próxima visita de siguimientu a Hondures, qu'investigue n'especial la situación nel Baxu Aguán, recordando que l'Estáu d'Hondures, entá dempués del golpe d'estáu y de la esclusión de la OEA, caltien obligaciones asumíes col derechu internacional de derechos humanos, polo que la organización esixe la retirada de los militares a los sos cuarteles, el cese inmediatu de la represión y de la violencia contra los grupos llabradores,  la protección efeutiva de la vida ya integridá personal de los y les defensores de derechos humanos y dirixentes llabradores, la investigación efeutiva de toles muertes de llabradores, el desenvolvimientu d'un procesu de diálogu francu, ensin violencia y constructivu col Movimientu Unificáu Llabrador del Aguán y les autoridaes del Institutu Nacional Agrariu.

Tamién piden el cumplimientu de la obligación del Estáu énte’l derechu a l'alimentación de les families llabradores, facilitándo-yos l'accesu afechu a la tierra y los medios necesarios por que puedan vivir del so trabayu dignamente. Y pa finar, la resolución efeutiva y entrega definitiva de les tierres del antiguu Centru Rexonal d'Entrenamientu Militar (CREM) a les comunidaes del Movimientu Llabrador del Aguán, “tal como lo establecen les lleis de reforma agraria vixentes y, en particular, el Decretu 18-2008”.