Empresarios y sindicatos esixen el desbloquéu de Sama-Velilla

UXT, CC.OO y la FADE esixen a les alministraciones y a toles fuerces polítiques un "exerciciu de responsabilidá" que desbloquie la construcción de Sama-Velilla.

Según sindicatos y empresarios, trátase d'una infraestructura "d'interés xeneral" pal conxuntu del Estáu, pal Noroeste en particular, pa comunidaes autónomes y a última hora pa los nuesos conciudadanos, "puesto que la creación de riqueza que van aportar va beneficiamoos a toos d'una o otra forma".
  
Asina, dixeron que les sos característiques y los sos trazaos tienen de responder a criterios globales" y non "municipales o provinciales". Algo que nun quita que puean plantegase actuaciones o inversiones complementaries y compensatories en territorios concretos que puean sufrir algún tipu d'afección nes sos actividaes económiques tradicionales, señalaron.
  
Recordaron que la llinia Sama-Velilla ta incluyida na vixente Planificación enerxética nacional de los sectores eléctricu y gasista 2007-2016, considerada como "prioritaria" y que la llínea ye necesaria tantu p'asegurar y amontar la capacidá d'evacuación de les xeneraciones enerxétiques de Castiella y Lleón, Galicia y Asturies como pa dotar de seguridá y calidá al suministru.
  
Amás, va dexar amontar la capacidá de xeneración enerxética necesaria nun mercáu peninsular con una cada vez mayor demanda, según amontar el potencial de xeneración y integración d'enerxíes renovables según un aforru de perdes nel tresporte, coles sos consecuencies económiques y medioambientales.
  
A xuiciu d'UXT, CC.OO y FADE, los retrasos nes conclusiones de les llinies eléctriques de Soto-Penagos y Lada-Velilla, que xeneren un estrangulamientu na evacuación de les xeneraciones enerxétiques de Castiella y Lleón, Galicia y Asturies, non yá tán perxudicando a la producción d'enerxía eléctrica, pa la que tanto Asturies como Castiella y Lleón son escedentaries, lo que supón un efectu "bien negativu" pa les sos economíes y pa la correcta integración de les enerxíes renovables, sinón que tamién pon en "seriu peligru" la seguridá de suministru a la Rede Nacional.