Coxersa aprobará'l llunes la construcción de la incineradora

La Xunta de Gobiernu de Coxersa va reunise'l próximu llunes p'aprobar l'entamu de los trámites pa la construcción d'una planta incineradora, asina como la so financiación.

Según consta nel orde del día de la convocatoria, a la que tuvo accesu Europa Press, el primer puntu del orde del día ye l'aprobación del acta anterior. El segundu ye l'Acuerdu que proceda sobre propuesta de la comisión delegada referente al entamu de trámites ambientales y alministrativos conducentes a la construcción y puesta en marcha d'una planta de valorización enerxética y conformidá a los precios que resulten una vez construyida dicha instalación'. La convocatoria, con esos dos puntos nel orde del día, ta roblada pol xerente de Coxersa, Rafael Fueyo Bros, y tien como fecha de salida'l 31 de marzu.

La Xunta de Gobiernu ye l'órganu supremu de xestión y alministración de Coxersa. Ta integrada por dos representantes de caúna de les entidaes consorciaes, escoyíes por elles mesmes. Tán representaos tolos conceyos y el Principáu.
  
L'acuerdu aprobáu pola Comisión Delegada inclúi encamentar a la sociedá instrumental Coxersa S.A. la construcción de la planta, na so integridá, "puesto que d'esta manera evítase que l'endeudamientu resultante consolide nes entidaes que participen nel Consorciu".
  
Tamién s'establez que, teniendo en cuenta que la inversión estimada ye de 250 millones d'euros y al nun disponese de recursos abondos, recúrrase pa la so financiación a los recursos ayenos necesarios.
  
Referente a la conformidá coles tarifes resultantes, señala que, según los estudios realizaos, van tar en unos 56 euros por tonelada (incluyendo amás de la incineración, la biometanización, el reciclaxe de basura bruta, etc) de residues urbanes "una vez puestos nel Centru de Tratamientu de Residuos d'Asturies". Ello sin prexuiciu de tener qu'aprobar nel momentu oportunu les "tarifes definitives", una vez conocíu l'importe real de la inversión, tipu d'interés de los créditos soscritos, preciu de venta de la enerxía eléctrica una vez puesta en marcha la planta y el restu de los elementos de costu previstos llegalmente".
  
L'acuerdu tamién establez "adautar el proyectu de la planta de reciclaxe de basura bruta pa facer posible la producción de Combustible Deriváu de Residuos (CDR) que puea valorizase nes cementeres y proceder igualmente a la so licitación, contratación y puesta en marcha", según encamentó a los Conceyos y al Gobiernu del Principáu a la realización d'un "esfuerzu adicional" en reciclaxe, tanto nel fomentu de la recoyida selectiva como nel usu de productos y materiales reciclaos.
 
Postures
  
El vistu buenu de la Xunta de Gobiernu de Coxersa va ser un impulsu importante pa un proyeutu que se vien promoviendo dende les files del PSOE dende hai tiempu, teniendo en cuenta que la capacidá del actual vertederu de residuos, en Serín, va agotase nel 2015.
  
Foi'l pasáu 25 de xineru cuando la Comisión Executiva Autonómica de la Federación Socialista Asturiana (FSA)-PSOE decidió solicitar al Gobiernu, apoyáu por PSOE y IU-BA-Verdes, qu'encamentara a Coxersa que decidiere en firme la propuesta pal tratamientu de los residuos n'Asturies qu'apueste pol reciclaxe, el compostaxe, la biometanización y pola incineración de residuos.
  
El secretariu xeneral de la FSA-PSOE, Javier Fernández dixo que los socialistes yá incluyíen esi proyeutu nel so programa electoral, polo que la decisión de güei ye coherente, refiriéndose a la páxina 104 del citáu programa na que se dicía que "el plan de futuru contempla actuaciones en materia de valorización enerxética sobre les que s'abrió un periodu de debate social nel que tamos participando activamente".
  
IU mostró'l so refugu al proyeutu, considerándolo innecesariu frente otres alternatives como potenciar el reciclaxe, anque nun considera qu'afecte al pactu de Gobiernu colos socialistes. Ello ye que'l citáu pactu nun inclúi nada referente a la incineradora. Los representantes de Coxersa caltuvieron xuntes colos distintos grupos parlamentarios, y el PP sí aceptó la propuesta. Tamién mostró'l so apoyu la Federación Asturiana de Conceyos.
  
Nun lo tien tan claro la Unión de Consumidores d'Asturies (UCE-Asturies) que considera que nun fairía falta una planta d'esti tipu nel Principáu. Ello ye que n'Asturies constituyóse la Plataforma Asturiana contra la Incineración, qu'arrexunta a distintos colectivos y que s'opón frontalmente a esti proyeutu.