Los docentes asturianos son los más avieyaos

Suatea vien de denunciar que’l profesoráu asturianu presenta les tases más altes d'avieyamientu, mientres que los mozos tán obligaos a emigrar si quieren aportar al empléu públicu.

Según datos del Conseyu Escolar del Estáu, les plantiyes de profesoráu asturianu destacquen por ser les de mayor edá ente los docentes de too l'Estáu español, mientres que según indiquen, l'aprobación de la Ufierta d'Empléu Públicu na nuesa comunidá va obligar a miles d'asturianos a presentase n'otres comunidaes. “Esto quier dicir que Asturies forma profesoráu pa depués obliga-y a salir de la so tierra, aprobar oposiciones n'otres comunidaes ya intentar volver equí en Concursu de Tresllaos”, afirmen dende’l sindicatu.
 
Pa Suatea, les polítiques en materia d'educación y de personal docente llevaes a cabu pol Gobiernu asturianu son les responsables d'esti “trafullu”. Señalen que la crisis nun pue ser escusa p que nun esista estabilidá del profesoráu interín, nin por qu'haya ufierta pública d'empléu, “nun hai más que ver les cifres de convocatoria d'otres Comunidaes pa entender que los mozos asturianos tán obligaos a emigrar y esperar a que'l Gobiernu asturianu dexe los discursos pa pasar a los fechos”.
 
La razón d'esti avieyamientu de les plantiyes nun ye casual pal sindicatu, “Asturies ye la única comunidá onde nun esiste amenorgamientu d'horariu lectivu pal profesoráu mayor de 55 años”, que según apunten sería una midida xeneradora d'empléu que n'otros sectores ta promoviendo'l relevu xeneracional.
 
Pa Suatea, la xubilación a los 60 años, o’l amenorgamientu son claves por que la mocedá puea vivir n’Asturies y trabayar na enseñanza pública asturiana.