La integración de CCM en Caxastur va acabar a últimos de xunu

La integración de Caja Castilla-La Mancha en Caxastur marcha según lo previsto y va rematar a últimos del próximu mes de xunu, según anunció'l presidente de la caxa asturiana,

Manuel Menéndez participó nel XVII Alcuentru del Sector Financieru sobre la reestructuración del sistema entamáu por ABC, Deloitte y la Sociedá de Tasación, Menéndez indicó que la integración va cerrase a mediaos de mayu y l'operación va rematar mes y mediu más tarde. "El 30 de xunu queremos tenelo too zarrao, esperamos que se cumpla", aportunó Menéndez.
  
La integración remataría asina unos siete meses dempués de qu'a primeros de payares del 2009 el Bancu d'España autorizare a la caxa asturiana a facese col control de CCM en constatando que'l proyectu "cumple colos criterios de solidez y racionalidá económica y financiera, y respeta l'oxetivu de nun suponer costu pal erariu públicu".
  
El proyeutu va desarrollase pente medies de la integración parcial de CCM en Caxastur, al traviés de la cesión d'un conxuntu d'activos y pasivos de la caxa castellano-manchega al Bancu Lliberta (filial de Cajastur) nel que CCM va tener una participación accionarial del 25%. El Banco Liberta, la banca privada y personal de Caxastur, va treslladar la so sede dende Uviéu hasta Castiella-La Mancha.
  
Con esta estructura búscase "garantizar la supervivencia d'ambes caxes d'aforros, calteniendo la so independencia, composición d'órganos de gobiernu, y identidá y arraigonamientu nel so entornu social orixinariu", según indicó Caxastur cuando anunció la integración.
  
A últimos del pasáu mes de marzu los sindicatos con representación en Caja Castilla La Mancha (CCM) -CCOO, UXT, CSI-F, y CSICA- roblaron col presidente de Caxastur un protocolu llaboral pa dar garantíes y seguridá a los trabayadores de la entidá castellano-manchega nel procesu d'integración cola asturiana.
  
En virtú del acuerdu, Caxastur comprometióse a caltener colos sindicatos una mesa de negociación, y a nun poner en marcha midíes "traumátiques" pa los trabayadores y a caltener y estudiar "tolos alcuerdos llaborales" que los sindicatos yá algamaron.
  
Coles mesmes, esti documentu yá recoyó l'interés de toles partes en que la operación de la integración de CCM nel Grupu Caxastur remate y llogre l'aprobación definitiva de la mesma polos órganos correspondientes nel menor plazu posible.