Entamen un actu d’homenaxe a la Biblioteca Popular Circulante

|

La Direición Xeneral de Política Llingüística y el Conceyu de Castropol van entamar mañana vienres, un reconocimientu a la Biblioteca Popular Circulante y a los sos impulsores.

L'actu plantégase como una reconocencia institucional a esti proyeutu cultural singular qu'ente 1921 y 1936 dinamizó intensamente la vida social del occidente asturianu. Coles mesmes, y en collaboración cola editorial Ámbitu, va presentase'l volume “El ‘Teatro Aldeano’ da Biblioteca Popular Circulante de Castripol”, del que ye autor Xosé Miguel Suárez Fernández, que fai un percorríu pola historia d'esta iniciativa bibliotecaria, de la so filosofía y de les persones más implicaes na so creación y funcionamientu. Amás de recuperar nueve pieces teatrales inédites.
 
L'actu d'homenaxe va cuntar cola presencia de Consuelo Vega Díaz, Direutora Xeneral de Política Llingüística, y del Alcalde de Castropol, José Ángel Pérez. Coles mesmes, van participar dellos familiares de los impulsores de la Biblioteca, un grupu de mozos comprometíos cola so cultura y venceyaos políticamente a postures progresistes, sobre los que cayó un mantu de silenciu dende la Dictadura franquista.
 
L'homenaxe va entamar a les 19:00 hores, na Plaza del Conceyu de Castropol col descubrimientu d'una placa que reproduz l'ex libris de la Biblioteca Popular Circulante y que va quedar asitiada na esquina de la Casa Consistorial, que nel so día sirvió de sede a la Biblioteca.
 
Darréu, a les 19.30 hores, el Salón d'Actos de la Casa de Cultura de Castropol va acoyer la intervención d'autoridaes y la presentación del llibru “El ‘Teatro Aldeano’ da Biblioteca Popular Circulante de Castripol”, de Xosé Miguel Suárez. Depués va proyeutase’l bookclip ‘El Teatro Aldeano’, al que punxo música'l tríu Moxega, que va interpretar en direuto delles pieces.

Contador Estadistiques