UPL presenta unes nueves mocedaes “rexonalistes y non nacionalistes”

El secretariu xeneral, Melchor Moreno, dixo que les nueves mocedaes d’UPL sintonicen colos nuevos estatutos, “que marquen un sentir rexonalista, non el nacionalista de Conceyu”.

“Entendemos el país lleonés como una rexón dientro d'una nación, que ye España”, dixo Moreno, que recordó como la organización d'Abel Pardo nun tien afecha la so organización a los nuevos estatutos, “que foi l'únicu condicionante pa dexar fora d’UPL a Conceyu, anque se-yos convidó a formar parte, pero caltuviéronse al marxe”, apuntó.
 
Sicasí, les diferencies ente los que remanen güei el partíu y Pardo van más allá d'esi perfil que dixebra a UPL del nacionalismu. Esta nueva estaya de mocedá supón el frañamientu dafechu con Pardo, apartáu de les sos responsabilidaes na capital lleonesa y nel partíu per cuatro años.
 
Les nueves mocedaes, en pallares de Moreno, ñacen tres una decisión valiente y acertada y quieren trabayar pel País Lleonés, “pola provincia”, dende l'ámbitu de la Universidá y l'institutu.
 
Esti coleutivu ta formáu güei por mediu centenar de mozos y basa los sos entamos fundacionales en lluchar pola autonomía del país lleonés (Lleón, Zamora y Salamanca), esplicó'l voceru de la organización, Rodrigo Ferrer Díez, de 20 años y estudiante d'Historia. “Vamos dir a por ello a muerte, porque ye un derechu constitucional”, anunció na rueda de prensa, a la que tamién asistieron otros once mozos y cuatro moces d'esta organización.
 
Pretenden “estender les esmoliciones lleonesistes a los mozos” y velar porque “nun s'escaeza lo que fuimos, somos y vamos ser”, apuntó.