Xega entama una campaña de prevención del VIH

Xega entama l'espardimientu de la campaña ‘VIH/Sida equí y agora. Falemos’ diseñada y coordinada pola Federación Estatal de Lesbianes, Gais, Transexuales y Bisexuales.

Trátase d'una estratexa innovadora na prevención de la tresmisión del VIH ente homes que tienen sexu con otros homes. Les sos característiques principales son l'usu de medios audiovisuales y de nueves redes sociales como Facebook, Twitter y Ximiélga.me pa la divulgación y la visibilidá de les persones VIH-positives al traviés de siete testimonios, siendo la característica fundamental de la campaña que se realizó dende la perspectiva y esperiencia personal de los gais que viven col VIH.
 
Na campaña, siete protagonistes qu'en dalgún momentu de la so vida infectáronse de VIH cunten en primer persona distintos aspeutos que faen referencia a la infección por VIH, a la necesidá de falar del VIH, de prevenir y de realizase la prueba si se tuvo una práctica de riesgu y, sobremanera, cola so imaxe conviden a la conocencia de la realidá del VIH.
 
La campaña busca tamién compensar la visión banalizadora de la infección por  VIH/Sida deformada por un escesu d'optimismu qu'esiste ente una parte de  los gais y la comunidá LGTB como resultáu de la introducción de los tratamientos antirretrovirales d'alta eficacia y que resta gravedá a la infección, y consecuentemente, la importancia a la prevención de la so tresmisión, según les sos consecuencies na salú, na vida cotidiana de les persones con VIH y na so redolada familiar y sociollaboral.
 
La campaña ye tamién una campaña que busca "pone-y cara" a la infección,  pente medies de la visibilidá de los gais con VIH,  frente al silenciu sobre la infección y el "armariu" nel  que s'atopen munchos gais con VIH, la campaña pretende dar la palabra y alzala a la comunidá LGTB por que ésta sienta y vea lo que los gais tienen que dicir al respeutive de la infección y la so prevención.
 
Amás XEGA va complementar esta campaña cola distribución n'Asturies de más de 8.000 preservativos y monodosis de llubricante gracies a la collaboración del Serviciu de Salú Poblacional de la Conseyería de Salú  y Servicios Sanitarios y va siguir col espardimientu de la campaña ‘Preba. Saber ye poder’, entamada n'avientu de 2009 cola distribución de 300 cartelos nuevos.
 
Según datos de ONUSIDA nel so Informe sobre l'andancia mundial de Sida  de 2008 "los gais siguen siendo'l grupu poblacional más espuestu al riesgu de contraer el VIH nos países d'Europa occidental", y según el  Ministeriu de Sanidá y Política Social "n’España más del 10% de los homes que tienen relaciones sexuales con otros homes ta infectáu pol VIH".