UNA reclama al Estáu l'aceleración del desemplegu p'autónomos

UNA encamienta al Gobiernu asturianu que reclame al central l'aceleración del desemplegu p'autónomos, yá que nun entienden que l'anteproyeutu nun se tramitare en plena crisis.

Faustino Zapico, como voceru de la organización, destacó la esmolición pol desamparu que tán sufriendo los trabayadores autónomos nesta crisis, “ensin que'l Gobiernu central tea actuando con premura abondo p'atender les necesidaes más fundamentales cuando éstos pierden el so emplegu”.
 
Poro, UNA encamienta al Gobiernu asturianu, “si ye cierto que tien una mínima sensibilidá social”, que reclame al executivu de Zapatero qu'entaíne nel desenvolvimientu del anteproyeutu de llei, que concede'l derechu de desemplegu a los autónomos, y que s'aprobó nel mes de payares, “pues en plena crisis económica, como nos atopamos, esti retrasu nun ye asumible nin pol coleutivu nin pola sociedá”.
 
La organización camienta qu'Asturies nun puede dexar qu'un sector de trabayadores quede albentestate en casu de perder el so emplegu y nun tolerar qu'esti anteproyeutu seya una nueva declaración d'intenciones del gobiernu Zapatero pa colos trabayadores “que depués queda en nada, como yá nos tien avezaos”.
 
Dende UNA señalaron que nun consideren l'anteproyeutu como abondo pa cubrir toles necesidaes de los trabayadores autónomos en desemplegu, “porque somos conscientes de que munchos nun van tener prestación” indicó Faustino Zapico, lo que nun ye torga pa que “cuando'l gobiernu central anuncia una meyora social pa esti coleutivu, nun pue retrasala inxustificadamente y aguardar a que la crisis asele pa ponela en práctica” porque “ye inmoral xugar coles mires d'un coleutivu namás por interés partidista”.