El PAS califica de “caradures” a los responsables de Tráficu

El PAS diz que la instalación de cuatro radares na Autovía del Cantábricu ente Villaviciosa y Xixón nun tien otra finalidá “que la de meter mano nel bolsu de los ciudadanos.

Pa la organización, “la función de dichos radares nun ye señalar nenguna zona peligrosa, sinón a cencielles la d'obligar a amenorgar la velocidá a 100 per hora enantes de volver facelo nos túneles, lo que ye claramente superfluu”.
 
El Partíu Asturianista reta a la Direición Xeneral de Tráficu a que faiga públiques les estadístiques d'accidentes nesos trechos (Grases-L’Infanzón), “pa que puea xulgase sobro la hipotetiquísima necesidá de dichos radares en función de la seguridá del tráficu”.
 
Coles mesmes, califiquen d'un actu de caradura'l qu'ún de los cuatro radares, na boca norte del tunel de Brañavieya, nun tienen señal anunciadora anterior de llimitación de velocidá, “polo que constitúi una auténtica garduña confiscatoria”.