L'APTA denuncia a RTPA polos contratos de programes

L'Asociación de Productores de Televisión d'Asturies interpunxo una demanda contra RTPA, pa solicitar l'anulación de la Instrucción que regula los procedimientos de contratación.

Pa la APTA, na TPA nun esiste nenguna convocatoria pública pa licitar contratos destinaos a la producción de programes. “Según les fontes xurídiques consultaes, tolos programes qu'emite TPA na actualidá, y una mayoría de los yá emitíos, podríen nun tener sofitu llegal, yá que nun foron contrataos de conformidá cola Llei 30/2007 de Contratos del Sector Públicu”, afirmen.
 
Pa l’asociación, esta circunstancia supunxo la esclusión del mercáu de delles decenes de millones d'euros, “que pudieron ser apurríos de manera direuta, ensin nenguna clase de competencia pública nin control dalgunu, a un númberu bien amenorgáu d'empreses, n'ocasiones ayenes por completu a la rexón”. Según afirmen, estos datos coinciden en bona midida colos incluyíos nel informe de fiscalización del Ente realizáu apocayá pola Sindicatura de Cuentes del Principáu d'Asturies.
 
Asina, esclaroen, nun se taríen axudicando los recursos públicos a les ufiertes económiques más ventaxoses y nun se taría contribuyendo al desenvolvimientu d'una industria audiovisual n'Asturies, “que yera una de les principales razones de la creación y esistencia d'una televisión autonómica”.
 
Amás d'esta demanda que s'acaba d'interponer, en feches próximes van entamar otres acciones llegales pa que los fondos públicos de RTPA seyan axudicaos en procedimientos abiertos que favorezan la concurrencia y l'aforru de costos pal presupuestu del Principáu y el fortalecimientu de les empreses asturianes del sector.
 
“En momentos de crisis económica como los que desgraciadamente vivimos, con tres centros formativos na rexón sacando al mercáu unos cien mozos tolos años, entendemos que contribuyir a xenerar paru y probitú nun tendría de ser el criteriu a siguir polos xestores de fondos públicos”, concluyen