Alberto Fernández premiáu col 'Distintivu Fini Suárez'

|

L'artesanu gaiteru Alberto Fernández foi'l ganador del X Distintivu a la Investigación folklórica 'Fini Suárez', un premiu que recuerda la memoria de la reconocida folklorista mierense.

El premiu enmárcase dientro de los actos culturales de la Folixa na Primavera de Mieres, cita que se va celebrar los díes 16, 17 y 18 d'abril, un escaparate internacional de les músiques que se realicen nel Arcu Atlánticu. Al actu de presentación del ganador asistieron el conceyal de Festexos, Rafael Perdiguer, y una representación de xuráu d'esti Distintivu, encabezaos pol gaiteru Jorge Fernández Areces, que relató los llogros del distinguíu nesta edición.
  
Según informó'l Conceyu de Mieres, Alberto Fernández Velasco ye un  artesanu que destaca como constructor de gaites asturianes y al que se distinguió pola meyora de les cualidaes tímbriques y tonales de la gaita.
  
El distintivu va apurríse-y a Fernández coincidiendo col pregón de la Folixa na primavera, el próximu vienres 16 d'abril, nel parque Jovellanos. L'actu va entamar a les 20.00 hores col pregón, al cargu de Celso Fernández, periodista radiofónicu, y de siguío, sobre les 20.15 hores, va tener llugar l'actu d'entrega del Distintivu Fini Suárez pa, de siguío, proceder a la espicha de les pipes de sidra.
    
El conceyal de Festexos, Rafael Perdiguer, destacó la importancia d'esti distintivu, "un homenaxe a la folclorista mierense que tanto fizo pola recuperación de la nuestra cultura, nun tiempu nel qu'esti llabor nun yera tovía tan apreciáu como, por suerte pa toos, yelo agora".
 

Contador Estadistiques