Les esportaciones del sector agroindustrial triplicáronse

Aurelio Martín sorrayó la creciente capacidá esportadora y esplicó que nel 2008 el valor de les esportaciones foi de casi 175 millones, al respeuto de los 60 millones de 1998.

El Conseyeru de Mediu Rural y Pesca fixo estes manifestaciones en Madrid, onde presidió l'actu institucional de presentación del stand d'Asturies nel XXIV Salón Internacional del Club de Gourmets. Acompañáronlu'l Director Xeneral de Ganadería y Agroalimentación, Luis Miguel Álvarez Morales y el restaurador Nachu Manzano.
  
Mientres la so intervención, el Conseyeru señaló que la presencia d'Asturies nesta cita gastronómica "ye namás un reflexu de la importancia que n'Asturies tien el sector de la industria agroalimentaria". Esplicó que nel nuesu país más de 9.000 persones trabayen nesti sector, lo que representa más del 14% del total del emplegu industrial d'Asturies. El valor total de les ventes de la producción agroindustrial avérase a los 2.000 millones d'euros, lo que supón más del 15% del valor total de les ventes del conxuntu del sector industrial asturianu y el consumu de materies primes d'esti sector superó los 800 millones d'euros el pasáu añu, algamando un 13% del total del consumu industrial d'Asturies".
  
Aurelio Martín dixo que la Conseyería de Mediu Rural y Pesca garantizó pa esti añu 2010 ayudes a los llabradores y ganaderos asturianos por un importe de 90 millones d'euros, que nel casu del sector llecheru representa una subida del cincuenta por cientu al respecto de les del añu anterior.
 
Los meyores quesos del mundu
  
Al respeuto de la calidá de los productos asturianos, Martín utilizó les palabres del críticu gastronómicu estadounidense Gerry Dawes. El conseyeru esplicó que Dawes, acabante de visitar Asturies, afirmó que nesta comunidá prodúcense algunos de los meyores quesos del mundu, sobremanera los azules. Martín aseguró que non yá los quesos, sinón tamién la sidra y el vinu de Cangas de Narcea impactaren al críticu norteamericanu.
  
Tres la so intervención, Martín dio la palabra al restaurador Nachu Manzano, qu'indicó que bona parte del éxitu que nesti momentu vive la cocina asturiana débese a la calidá de la despensa qu'apurren llabradores, ganaderos y pescadores.
  
El restaurador, l'únicu n'Asturies galardonáu con dos estrelles Michelín, aseguró que, nos últimos años, la rexón diera un gran pasu p'asitiase a la vanguardia de la gastronomía n'España y cada vez yera más reconocida internacionalmente.
 
Asturies nel Salón de Gourmets
  
La Conseyería de Mediu Rural y Pesca participa nesta cita agroalimentaria con un stand institucional nel que tán presentes 23 empreses asturianes, amás de 12 denominaciones de calidá: sidra d'Asturies; los quesos de Gamonéu, Cabrales, Afuega'l Pitu, Casín y los Beyos; el Vinu de la Tierra de Cangas; la Escanda d'Asturies; la Faba Asturiana; la Xata Asturiana; el Choscu de Tinéu; y les producciones amparaes pol Conseyu Regulador de l'Agricultura Ecolóxica.
  
El stand del Principáu, asitiáu cerca de la entrada principal del Pabellón 6, nel númberu D36, ocupa una superficie de 396 metros cuadraos, distribuyíos en delles zones.