Darréu denuncia “persecución política” en Llangréu

Darréu quier denunciar “les torgues que siguimos sufriendo por parte del Ayuntamientu de Llangréu dende qu’entamamos a cellebrar na localidá’l Día de la Mocedá Revolucionario”.

La organización denuncia que cualesquier xera pa la que Darréu solicita permisos nel conceyu de Llangréu ye refugada, “la negativa ye sistemática por parte del ayuntamientu, cualesquier actividá que queramos entamar nesti conceyu supón una llucha diaria y continúa”.
 
Afirmen que nun añu acumulen más de 10000 € en multes, “les caberes, de la selmana pasada, pol valor total de 5800 € que correspuenden a: 100€ por cartelos en contenedores, 3500 € por pintaes y 2200 € por pegadielles en contenedores”.
 
Pa la organización esiste un doble raseru al aplicar les lleis en Llangréu, “yá que lo qu’al ayuntamientu del PSOE esmolez-y nun ye la llimpieza de les paredes públiques del conceyu sinon que la mocedá llangreano s’autoorganicen, tengan idees propies  y seyan críticos col sistema políticu y col gobiernu municipal”.
 
“Esta persecución política escontra Darréu tien de finar, el PSOE llangreanu nun pue utilizar el control del Ayuntamientu pa perseguir a la mocedá crítico col sistema y l’Estáu español”, afirmen.