Vistu pa sentencia'l xuiciu contra cuatro dirixentes d'IU

El xuiciu pol que cuatro dirixentes d'IU enfréntense a una suma d'ocho años de cárcel por un delitu de coacciones al secretariu xeneral del PCA, Francisco de Asís, quedó vistu pa sentencia.

Ente los implicaos tán el coordinador xeneral de la coalición, Jesús Iglesias, y l'actual conseyera de Bienestar Social y Vivienda, Noemí Martín.  
 
Na segunda y última sesión, les partes alzaron a definitives les sos conclusiones provisionales, mientres que'l fiscal superior del Principáu d'Asturies, Gerardo Herrero, ratificóse nel pidimientu de que se sobresea la causa y absuélvase a los cuatro imputaos -Noemí Martín, Jesús Iglesias, Alfonso Suárez y Luis Álvarez-.

Pal Ministeriu Fiscal, la retirada del PCE dexa "inerme" a l'acusación particular y "nun hai prueba pa imputar un delitu de coacciones". Pa Herrero, "nun quedó probao'l que ordenó'l cambiu de les peslleres" de la sede qu'ambes formaciones compartíen y, anque asina fuera, "nun hubo intención de perxudicar a naide".
  
El conflictu desencadenóse tres una crisis vivida nel 2007 nel senu de la coalición que derivó, en mayu, nun enfrentamientu sobre l'usu de la sede de Plaza América, n'Uviéu, arrendada a IU d'Asturies, pero de la que ye dueñu'l Partíu Comunista.
  
L'acusación particular, exercida por De Asís y representáu ésti pola lletrada Ana Taboada, solicitó amás dos años d'inhabilitación pa cargu públicu y una indemnización de 3.000 euros por prexuicios.
  
Taboada calcó na vinculación de los delitos de falsedá documental y coacciones y indicó que "una cosa ye retirar l'acusación y otra desdicirse de lo manifestao mientres la instrucción". Nes conclusiones, resumió que los dirixentes d'IU "escurrieron y executaron la ocupación de la sede" pente medies de la contratación d'un cerraxeru y d'una empresa de seguridá a la que dieron instrucción de "usar la fuerza" en casu de necesidá. "Si nun hubo más usu de la mesma debióse al comedimientu de los comunistes y a que los vixilantes desatendieron unes ordes clares", caltuvo.
 
Pela so parte, Ana García Boto, lletrada d'Iglesias, Martín y Álvarez, criticó "una deficiente instrucción procesal" y solicitó l'absolución porque "nun se dan nengún de los elementos pa que l'acción seya constitutiva de delitu". Encamentó, coles mesmes, a que s'impongan les costes de la defensa a l'acusación particular que "de forma temeraria fizo sentase nel banquín a dos parlamentarios y a un ciudadanu d'a pie".
  
Pa Boto, los fechos enxuiciaos parten d'una situación de coacción previa de la que yera víctima IU. Respecto al PCA, ironizó: "Paez más el camarote de los Hermanos Marx qu'una organización política que s'aprecie".
  
Mientres la sesión, presidida pol presidente del TSXA, Ignacio Vidau, escucháronse les declaraciones de los vixilantes de seguridá que custodiaron la sede los díes 29 y 30 de mayu del 2007, d'un cerraxeru y d'una trabayadora de la Unidá Técnica Alministrativa de la mesma.
  
Los guardies manifestaron qu'esos díes quedaron dientro de les oficines "pa evitar situaciones de fuerza". Dixeron, amás, que recibieron ordes de la empresa de qu'echaren a los militantes del PCA "como fuera" y, ún d'ellos, aseguró recibir una llamada d'un dirixente d'IU, al qu'identificó como "Jesús", na que los alvertía de "consecuencies" si nun obedecíen les instrucciones de desallugu.
  
L'alministrativa, pela so parte, apuntó a la esistencia de "barullu y xaréu" nuna época electoral. Dixo qu'el PCA cambió peslleres y ocupó despachos y llamentó qu'una supuesta orde de baxa per parte del Partíu Comunista dexólos ensin teléfonu, fax, nin Internet", polo que finalmente treslladáronse a una sede qu'IU arrendara "había un mes" nel Centru Cívicu, n'Uviéu. Aseguró, coles mesmes, que foi un afiliáu del PCA'l que rompió la cámara de video-vixilancia instalada a la entrada de la sede qu'ambes agrupaciones compartíen.