El Principáu abre la convocatoria de subvenciones pa Centros Asturianos

L'Axencia d'Emigración acaba d'abrir el plazu de solicitú de subvenciones a les Comunidaes Asturianes con reconocencia d'asturianía, 94 centros en total tienen esti reconocimientu.

L'oxetu de la convocatoria ye sofitar la realización d'actividaes d'impulsu y espardimientu de la cultura asturiana y collaborar por que puedan siguir funcionando y desempeñando’l trabayu que vienen desendolcando pa caltener ya intensificar los sos venceyos con Asturies.
 
Puen optar a la convocatoria d'estes subvenciones tolos Centros Asturianos que cunten con reconocencia d'asturianía, que nesti momentu son 94 partíos xeográficamente de la siguiente forma: 53 n'América, 32 n'España, 6 n'Europa, 2 n'Asia y ún n'Oceanía.
 
Na edición de 2010, van tener prioridá les actividaes conmemoratives especialmente significatives, l’averamientu a la tierra d'orixe de grupos d'asturianos o descendientes hasta segundu grau, les actividaes culturales, les actividaes formatives rellacionaes cola cultura tradicional asturiana y, pa finar, les actividaes deportives.
 
La convocatoria, amás de subvenciones pa la realización d'actividaes que contribuyan a impulsar y esparder la cultura asturiana, contempla otra llinia destinada a inversiones n'equipamientos nos centros.
 
Les bases de la convocatoria pal exerciciu 2010, a la que se destinen 730.700 euros, apaecen publicaes nel BOPA. El plazu de presentación de solicitúes estiéndese hasta'l próximu 13 de mayu.