Dar voz a la indefensión

Hai unos díes circulaba pela AS II llegando a los polígonos industriales de Porceyo, cuando decubr, caminando en sentíu contrariu pel arcén, a un home calzáu con unes madreñes y cargando con una guadaña. La escena, amás de despertame una tristura enorme, paecióme paradigmática de la indefensión que vive la zona rural del conceyu de Xixón. L’home volvía de segar dalguna finca, seguramente ún de praos acorralaos poles grandes superficies, concesionarios y naves industriales.. Una d’eses finques que los sos propietarios anecien en mantener demientres qu’esperen a que llegue lúnicu autobús que-yos mandará l’Ayuntamientu: un nuevu PGOU que valore’l so trabayu dende un despachu y a un preciu berbaxo del so valor real.
 
La indefensión de la ciudadanía de la zona rural, por embargu, nun entama nel momentu nel que se recalifiquen les viviendes, sinón qu’esti ye’l ramu d’una carrera de fondu que fai que seyan, queramos o non, ciudadanos y ciudadanes de segunda. El primer capítulu escribiéronlu les polítiques agraries y ganaderes de la Unión Europea, pero sobre manera la deficiente xestión de los ingresos comunitarios. La falta d’alternatives llaborales y la despreocupación pola busca de soluciones y aprovechamientos sostenibles de los recursos del campu, lleva a la zona rural a una reconversión tapecida dende va más de venti años. Una reconversión ensin barricaes nin manifestaciones, pero que tien valtiao miles de puestos de trabayu amás de la nuestra soberanía alimentaria. Pero la falta de trabayu nun ye otro qu’un peldañu más de la escalera. L’accesu a los servicios básicos nun pue comparase na ciudá y nel campu. A les seculares diferencies na recoyida de la basura o’l mal estáu de les caleyes y les carreteres, vienen a sumase otres torgues modernes, como’l defectuosu y carísimu accesu a la Rede, carretera virtual pernecesaria pa la creación d’actividá productiva y pa comunicase cola alministración. Pero equí nun acaba too, los tocaos servicios educativos o sanitarios de la zona rural aguanten delles veces la espansión de la ciud, como denunciaron el branu pasáu los vecinos de Cabueñes y agora los de Roces, que ven como los sos colexos queden pequeños énte l’afluencia de población nueva que llega arriendes de los planes urbanísticos que xestiona’l propiu equipu municipal.
 
Desmantelada la zona rural pola falta de viabilidá económica, xibarizaes les sos infraestructures y servicios, lúltimu pasu de la cadena paez ser l’asaltu del lladriyu sobre les parroquies ensin que cuente pa nada la opinión de los que yá viven nelles. Too por cuenta del mesmu equipu de gobiernu que regula les construcciones ganaderes imponiendo multes desproporcionaes al que se sal de la norma y qu’intensifica l’Impuestu de Bienes Inmuebles (IBI) sobre cuadres que yá nun son rentables y sobre elementos del padremuñu cultural como los horros. Son los mesmos responsables políticos capaces de roblar un Plan Xeneral d’Ordenación que cuenta llevantar en Castiello Bernueces, Xove, Porceyo, Granda y Roces, na meyor de les alternatives presentaes, un total de 10.700 viviendes; al tiempu que corten les venes de Cabueñes con una carretera d’alta densidá acompañada de cientos de viviendas y espropien mediu San Andrés cola ZALIA cargándose de pasu ocho horros protexíos.
 
Por embargu, y pese a la falta d’alternatives económiques, la falta de servicios de toa mena, los impuestos y multes abusives y les espropiaciones y planificaciones urbanístiques indecentes; talamente paez que los homes y muyeres de la zona rural de Xixón nun tuvieren siquiera’l derechu a protestar. A la fin, representen un porcentaxe del conxuntu total de votos, y polo xeneral, ellí gana la oposición. Amás, y como sorrayaba hai poco’l ensin ponese coloráu’l conceyal d’Urbanismu, Pedro Sanjurjo, lo meyor ye frenar la espansión de les zones rurales, “ordenando el espacio para futuros suelos urbanos”. La intención del Ayuntamientu, poro, pasa a ser manifiesta, y por esa razón nun dexa de poneme triste la imaxen del home que camina solu pela carretera de vuelta de segar, convencida de que ye’l nuestru derechu y la nuestra obligación, a lo menos, da-y voz a la so indefensión.