Los asturianos residentes en Panamá reivindiquen el so derechu al votu

El presidente del Centru Asturianu de Panamá, Hilario Suárez Trabadelo, reivindicó'l derechu al votu de los emigrantes nes eleiciones locales, autonómiques y estatales.

"Queremos siguir votando, ganemos esi derechu", caltuvo. Hilario Suárez reclamó, igualmente, que los partíos españoles "tengan en cuenta" la opinión de los residentes nel estranxeru  a la hora de tratar una posible reforma de la llei electoral que llende'l so derechu al votu.

  
Estos fueron los pidimientos que fixo mientres la so intervención nel alcuentru que caltuvo la delegación institucional y comercial del Principáu cola coleutividá asturiana en Panamá namás llegar al país, coincidiendo cola inauguración del nuevu negociu hosteleru de Suárez, la Taberna del Canal.
  
El presidente del Centru Asturianu calcó en que los españoles presumen especialmente de la Transición y de la Memoria Hestórica, polo que considera una "falta de memoria" pensar que los emigrantes tán fuera d'España "por gustu", cuando la mayoría tánlo "porque n'España nun podía votase nel so momentu".
  
Poro, afirmó que-y dolió como "demócrata" conocer l'estudiu de la propuesta de reforma y pidió al presidente del Principáu, Vicente Álvarez Areces, que represente a los emigrantes por que "los tresnochaos de la política dean cuenta del vínculu que tienen los que viven fuera col so llugar d'orixe".
  
Areces recoyó'l testigu y calificó d'oportunos los sos pidimientos al recordar que mientres el viaxe institucional qu'entama pel Caribe y Centroamérica dende'l día 9 d'abril, yá apostó por tener "sensibilidá bastante" pa caltener el derechu al votu de los emigrantes
  
Amás, el presidente asturianu esplicó a los asistentes que l'oxetivu de la misión ye reforzar les relaciones institucionales y empresariales nel país, del que dixo que "mientres la crisis ta creciendo" y por tanto "Asturies quier participar nel procesu".
  
Tres esti primer contactu cola colonia asturiana en Panamá, d'algo más de 300 persones y compuesta mayoritariamente d'empresarios y profesionales, Areces va siguir la so estancia nel país calteniendo entevistes institucionales hasta'l 14 d'abril.