Candás nun va celebrar esti añu’l Festival de Bandes de Gaites

El Festival de Bandes de Gaites Villa de Candás nun ve otra solución que suspender los preparativos de la so decimocuarta edición por non cuntar con abondu sofitu municipal.

Esti certame ye’l festival musical del que se celebraron más ediciones en Carreño, el más llonxevu del so tipu n’Asturies y el que cuntaba con una mayor repercusión nos medios de comunicación y el públicu d'ente los del conceyu y los del so xéneru en tol país.
 
El festival convirtiérase yá nuna de les feches obligaes dientro del calendariu d'actos rellacionaos cola música tradicional y la cultura asturiana llegando tamién al empar a ser consideráu polos vecinos como una festividá más del branu nel so conceyu.
 
Depués de vese yá enantes obligada a camudar la fecha de celebración de dichu eventu,  “por falta de dineru y d'asumir perdíes l'añu anterior”, la comisión organizadora venía trabayando dende ochobre y yá cuntaba col sofitu de la hostelería y comerciu locales, patrocinadores  privaos, la ufierta de munches persones pa collaborar a títulu particular, alcuerdos con provisores y compromisos adquiríos con distintes bandes pa la so participación.
 
Sicasí, anguaño nun ven posibilidá de siguir yá que cree que la situación perpasó les llendes de lo razonable. “Sacar alantre un programa d'actividaes como'l de los trece años anteriores ensin malapenes medios, namás ye posible pente medies de grandes dosis de trabayu per parte d'un gran númberu de voluntarios y too pola mera ilusión de ver qu'un añu más el festival ye meyor que l'anterior, anque inevitablemente traiga un nuevu déficit económicu”, indiquen dende la Banda de Gaites de Candás.
 
Tamién critiquen qu’otros eventos más pequeños, con menor influyencia mediática, una presencia de públicu tan solo testimonial y que pasen muncho más desapercibíos reciben muncho más sofitu de too tipu per parte del consistoriu.
 
“Mientres unos crecen en númberu d'espectadores y calidá del so programa otros en paralelu ya incomprensiblemente son los que crecen en subvenciones, dende'l Festival de Candás preguntamos quién ye l'espertu que mide la rentabilidá de les inversiones n'actos culturales, qué estrañes vares de midir utiliza y cómo pue desperdiciar el potencial del Festival dexando a los vecinos ensin él”, apunten dende la Banda de Gaites.