El sector agroalimentariu asturianu facturó casi 2.000 millones nel 2009

Aurelio Martín asistió al actu inaugural del Salón de Gourmets, onde destacó la importancia del sector agroalimentariu que facturó nel 2009 más de 2.000 millones d'euros.

El Conseyeru de Mediu Rural y Pesca tamién señaló qu'esti sector da emplegu a 9.000 asturianos y ta integráu por más de 800 empreses. "Amás ye fundamental pal nuesu sector primariu, que ta integráu por 19.000 ganaderos", recordó.
  
Respeuto al comportamientu de les marques de calidá del país en tiempos de crisis, el Conseyeru señaló que "en términos xenerales tán aguantando y algunos hasta crecieron". Asina, destacó que nel 2009 la sidra con Denominación d'Orixe Protexida superó'l millón de botelles, la Indicación Xeográfica Protexida Xata Asturiana creció más del 17% y rexistráronse tamién aumentos na producción ecolóxica y los quesos de calidá. "El consumidor en tiempu de crisis valora'l preciu, pero tamién la relación calidá-preciu", aseguró.
  
La Conseyería de Mediu Rural y Pesca participa nesta cita agroalimentaria con un stand institucional nel que tán presentes 23 empreses asturianes, amás de 12 denominaciones de calidá: sidra d'Asturies; los quesos de Gamonéu, Cabrales, Afuega'l Pitu, Casín y los Beyos; el Vinu de la Tierra de Cangas; la Escanda d'Asturies; la Faba Asturiana; la Xata Asturiana; el Choscu de Tinéu; y les producciones amparaes pol Conseyu Regulador de l'Agricultura Ecolóxica.
  
El stand d'Asturies, asitiáu cerca de la entrada principal del Pabellón 6, nel númberu D36, ocupa una superficie de 396 metros cuadraos distribuyíos en delles zones. Na Zona Institucional tán representaes les Denominaciones de calidá d'Asturies y el mostrador d'atención al públicu. Na Zona d'empreses  participen un total de 23 firmes de los sectores: sidra, quesos, embutíos, productos llecheros, conserves, pexes, mariscos, platos preparaos, distribución d'alimentos y edición de publicaciones. Na Zona de Presentaciones desarrólase un programa de cates y presentaciones de los productos asturianos de calidá.
  
El stand dispón amás d'una Zona de Degustación, abierta al públicu, na que les empreses puen atender a los clientes interesaos en probar les escelencies de los productos ellaboraos n'Asturies pente medies de degustaciones que complementen les actividaes comerciales de los participantes.