El TSXA xulga a cuatro dirixentes d'IU por coacciones

El TSXA alcordó sobreseer a cinco dirixentes d'IU tres la retirada del PCE como acusación particular nun procesu abiertu pola confrontación ente les formaciones nel 2007.

El sobreseimientu supunxo l'absolución del ex diputáu d'IU Francisco Javier García Valledor, mientres que los cuatro imputaos restantes -Noemí Martín, Jesús Iglesias, Alfonso Suárez y Luis Álvarez- fueron xulgaos, acusaos d'un delitu de coacciones.
  
L'acusación particular exercida pol Secretariu Xeneral del PCA, Francisco de Asís, representáu pola lletrada Ana Taboada, solicitó dos años pa caún de los cuatro acusaos pol delitu de coacciones, según una indemnización de 3.000 euros a Asís, polos prexuicios. Pela so parte, la defensa qu'exercen los abogaos Ana García Boto y Sergio Herrero pidieron la llibre absolución.
  
El conflictu desencadenóse tres una crisis vivida nel 2007 nel senu de la coalición que derivó, en mayu, nun enfrentamientu sobre l'usu de la sede de Plaza América, n'Uviéu, arrendada a IU d'Asturies, pero de la que ye dueñu'l Partíu Comunista.
  
El Ministeriu Públicu, que solicitó la llibre absolución de los acusaos al entender que nun podíen probase los delitos, consideró güei que'l PCA ye "un apéndiz del PCE" polo que "nun hai llugar a tomar parte como acusación particular". Aceptó, sicasí, qu'actúe como perxudicáu no relativo al delitu de coacciones, puesto que "de resultes de los fechos de mayu del 2007 viose priváu del usu del llocal".
 
  
Nel xuiciu oral, celebráu nel TSXA pola condición d'aforaos de los imputaos, toos ellos, nun siendo Alfonso Suárez, negáronse a responder a les entrugues de l'acusación particular, exercida polos sos adversarios políticos".
  
A entrugues del Ministeriu Públicu y de la defensa, toos coincidieron al señalar que nun hubo una xunta formal na que s'alcordara'l cambiu de peslleres de la sede, anque sí un intercambiu d'impresiones. "Comentar que cuando pasaren les elecciones tenía de normalizase la situación", señaló l'actual conseyera de Bienestar Social y Vivienda, Noemí Martín.
  
Martín esplicó amás que la decisión de dar por acabáu l'usu compartíu del llocal foi "política". Precisó que la mesma suponía exercer los sos derechos como arrendatarios y tomóse "ante una situación anómala", porque de lo contrario "dexaríen l'usu compartíu". "Cambiamos les llaves por seguridá y por volver a una situación de normalidá nel trabayu", declaró ante la sala.
 
El coordinador xeneral d'IU d'Asturies, Jesús Iglesias, llamentó l'actitú de los comunistes, que presentaron esi añu cinco candidatures municipales baxo les sigles d'Asciz "pa competir con IU" y que por un sistema de turnos "ocuparon dafechu la sede de la Plaza América". "Diéronmos una navayada pela espalda nun momentu críticu, como ye un procesu electoral". "Nun mos asocediera qu'alguién mientres una campaña pudiera actuar con tantu odiu", acabó.
  
Iglesias indicó que les desavenencies obligaron a alquilar un llocal pa la campaña electoral, na que funcionaron "como pudieron" y "sin documentación clave". "Al acabar decidimos recuperar esos llocales como arrendatarios", precisó.
  
El primeru de los 14 testigos citaos na vista -del PCA- esplicó que la mañana del 29 de mayu dos guardes negáron-y l'accesu a la sede si nun taba nuna llista ellaborada por IU. Momentos dempués vio salir del portal a un cerraxeru, ante lo qu'acudió en compañía d'Asís a poner una denuncia en Comisaría.
  
Reconoció amás que "ocho o diez díes antes" consultaron al Partíu en Madrid si esistía un contratu d'arrendamientu con IU y, ante la negativa, decidieron ordenar el cambiu de les peslleres. "Namás les de los despachos tocantes al usu del PCA", según apuntó otra de los testigos, muyer de De Asís.
  
Ésti, pela so parte, dixo qu'esa primavera estrenaron dirección nel senu del partíu, pero nun teníen sdee na que trabayar, puesto que los antiguos integrantes de la cúpula "nun reconocieron el VIII Congresu del Partíu", celebráu nel mes de marzu del 2007.
 
Esplicó que se dirixeron a ellos pente medies de un requerimientu notarial y pidiéron-yos que-yos enseñaren el supuestu contratu d'arrendamientu. Ante'l protocolu con que-yos respondió IU "entendimos qu'aquello pa nada-yos permitía siguir usurpando despachos" y procedieron al cambiu de les citaes peslleres. "Ficímoslo con un tactu esquisitu porque a pesar de la confrontación política nun había interés en cambiar l'usu compartíu".
  
Mientres la so declaración, criticó qu'IU "secuestró" los cartelos del primeru de mayu, según les ediciones de la publicación 'Mundo Obrero' del mes d'abril. "Había una torga real del funcionamientu del Partíu Comunista d'Asturies", dixo.
  
N'esplicando los fechos relativos a les xornaes del día 29 y 30 de mayu del 2007, nes que "recibió un emburrión d'un guarda de seguridá cuando se disponía a entrar", consideró que l'oxetivu "taba claru" y yera "que'l Partíu Comunista nun pudiere funcionar".
  
La primer sesión del xuiciu acabó güei, tres más de cinco hores, cola declaración de Francisco de Asís. La vista volvió entamar mañana a les 10 hores cola declaración del restu de los testigos, a lo que va siguir la fixación de posiciones peles partes.