Un reporteru chinu visitó Asturies pa conocer la nuesa cultura

El periodista Fan Yibo, creador d'ún de los blogues turísticos más visitaos de China, visitó esta fin de selmana Asturies interesáu en los nuesos recursos turísticos y la nuesa cultura.

El so viaxe de conocencia va traducise nuna promoción d'Asturies tantu nel so blogue como n'otres publicaciones especializaes coles que'l reporteru collabora.
 
Caún de los artículos publicaos nel blogue “Quiseditu” (“Mapa de siete colores”) cuenta con una media de 10.000 llectores, polo que ye una oportunidá p'asitiar Asturies en mercaos de llarga distancia tan importantes como'l chinu. De la mesma, esti blogue ta dientro del portal númberu ún de China, www.sina.com.cn.
 
El viaxe, entamáu pola Sociedá Rexonal de Turismu (SRT) en collaboración cola Oficina Española de Turismu en Pequín, llevó a Fan Yibo –gran apasionáu de la cultura española y almirador de los monumentos Patrimoniu de la Humanidá- a descubrir l’Arte Asturianu, el nuesu pasáu romanu y dalgunos de los nuesos equipamientos singulares, amás de los centros históricos d'Uviéu y Xixón.