Areces quier que los emigrantes exerzan el so derechu al votu

“Queremos que los emigrantes nel esterior exerzan los sos derechos porque nun se trata d'una emigración que nun tea afincada cola tierra”, afirmó Areces na República Dominicana.

El Presidente del Principáu faló sobre la reforma de la llei electoral, tres aconceyase cola comunidá d’emigrantes asturianos en Santu Domingu.
 
P’Areces, tolos emigrantes asturianos caltienen un venceyu de residencia y de presencia física n'Asturies, “non yá presencia física individual sinón tamién al traviés de proyeutos comunes, tendríamos de tener la sensibilidá abonda pa que sigan participando nesi derechu al votu qu'hasta agora-yos ta reconocíu”.
 
El Presidente del Principáu dixo que la emigración asturiana nel esterior ye una comunidá qu'en porcentaxe cola nuesa población ye más alta que la del restu l’Estáu,  “y el llexislador tien que tener presente esa situación”"
 
Sicasí, Areces reconoció qu'hai fenómenos nuevos qu'hai qu'esaminar, “como por casu la reconocencia de nacionalidá a los nietos que nun tuvieron venceyu de residencia con Asturies”.