L'Añu Santu acaba esti domingu con un balance de más de 100.000 pelegrinos a Uviéu y Cuadonga, según l'Arzobispáu

L'añu Xubilar de la Santa Cruz d'Uviéu acaba'l próximu domingu día 11 de xineru con un rexistru de más de 100.000 pelegrinos que participaron nes distintes celebraciones que se desarrollaron na catedral de la capital del Principáu y la basílica de Cuadonga, según les cifres del Arzobispáu.

Los actos de clausura van celebrase'l sábadu a les 18.30 hores en Cuadonga y el domingu 11 na catedral d'Uviéu, de magar les 17.00 hores.

Según indicaron fontes del Arzobispáu d'Uviéu a Europa Press, el "éxitu" del Añu Santu apoya la propuesta de que tenga continuidá. Asina, la proximidá del Añu Xacobéu nel 2010 --la so pelegrinación ta rellacionada cola d'Uviéu-- xunto cola apuesta pola recuperación del Camín Primitivu y los demás Caminos de Santiago pel Norte, podía valir de "bona acoyida al propósitu, según l'Arzobispáu".

Pa la Ilesia asturiana l'Añu Santu foi exemplu de la collaboración ente instituciones, axentes y fundaciones culturales. Nesti sen, l'Arzobispáu agradeció l'apoyu del Principáu d'Asturies, y l'Ayuntamientu d'Uviéu, la Universidá d'Uviéu y la Fundación Masaveu, ente otros.

L'Añu Santu de la Cruz foi'l primer añu xubilar na historia de l'Archidiócesis d'Uviéu siendo una "gracia" concedida con ocasión del 1.200 aniversariu de la donación de la Cruz de los Ángeles y el 1.100 aniversariu de la donación de la Cruz de la Victoria. Foi'l papa Bonifacio VIII, nel añu 1.300, el qu'instituyó'l primer Añu Santu de la historia de la Ilesia.

Los signos del Añu Santu fueron la pelegrinación, la indulxencia plenaria, la purificación de la memoria, el martiriu y la caridá, según apuntó l'Arzobispáu. De la mesma manera, l'añu de celebración católica tuvo como valores la fe, la esperanza, la caridá, la llibertá y la paz.