El Bloque denundia l'abandonu de la Sienda l'Osu

Bloque por Asturies denuncia l’abandonu nel que s’alcuentra la Sienda l’Osu a lo llargo de tol percorríu y pidió’l pieslle de dalgunes zones y el so arreglu.

Según la organización, na zona de mayor presión de visites, “que va dende l’área recreativa de Bullera (Villanueva), pasa pel cercáu del Osu y llévamos hasta Proaza”, ta tremao de pequeños puntos enllenos de basura, “pue vese amás qu’esfruten d’abonda ‘solera’”.
 
N’otros sitios, según el Bloque, puen vese muebles urbanos estrozáos dafechu. “Pero lo realmente grave y peligroso ye’l deterioru, o en dellos casos ausencia, del valláu que fai de zarru mientres tol camín, onde’l peligru pal pasiante o cicloturista ye tal que lo más racional sedría que les autoridaes competentes procedieren al piesllu de la sienda, polo menos nesti tramu, hasta que nun s’iguare dafechu”, señalen.
 
Recuerden que va dellos años perdió la vida na sienda una turista madrilana al cayer al vacíu, como consecuencia d’apoyase nuna valla podre o estropiada. “¿Qué se fixo dende entós p’acá nel arreglu, curiáu y mantenimientu de la sienda? ¿Tien qu’asoceder otra desgracia, pa que daquién tome midíes nel asuntu?”, entrúguense dende la formación.
 
La organización  diz nun entender de qué val que se gasten perres en campañes publicitaries promoviendo los valles de Trubia, Teberga y Quirós, o si cuando s’acomete una obra nun se planifica’l mantenimientu. Tamién entruguen si la Mancomunidá de los Valles del Osu nun tienen que dicir nada.
 
Poro, el Bloque por Asturies esixe una intervención rápida nel arreglu del valláu y mobiliariu, asina como la llimpieza de tolos puntos de vertíos illegales que puen vese a lo llargo de tola sienda. “De la mesma manera pidimos que la solución que se dea nel mantenimientu y conservación de la sienda seya de manera definitiva y nun se repita lo mesmo nos años venideros”, apunten pa finar.