Amnistía convoca una ‘flashmob’ contra la discriminación

Amnistía Internacional d'Asturies va salir güei a la cai pa sensibilizar a la población asturiana contra la discriminación. L’actu consiste nuna ‘flashmob’ a les 19.00 hores n’Uviéu.

Una ‘flashmob’ ye una acción organizada na qu'un grupu de persones axúntase de sópitu nun llugar públicu, realiza daqué ablucante y depués marcha rápido. AI n'Asturies llamólo La Gran Señalada.
 
Según indiquen dende Amnistia Internacional, “too trescurre con normalidá, la xente ta a lo suyo cuando, de sópitu, un grupu, lo más numberoso posible, que lleve puestu daqué mariellu (un pañuelu, cintu, camiseta...) señala en silenciu a una persona o persones que van tranquilamente caminando”.
 
Nel actu van tar señalando a persones tres minutos, mientres un activista d'AI va amosar una pancarta col testu "¿Imaxines ser blancu de discriminación? Pol fin de la discriminación na Unión Europea". Una vegada trescurríos los tres minutos daquién va faer una señal con un xiblatu y el grupu va marchar.
 
La Gran Señalada va realizase na entrada de Salesas de la cai Caveda en dos ocasiones, una a les 19:00 con una persona que va ser señalada pol so aniciu étnicu y otra a les 19:15 con una pareya d'homosexuales. Too va ser grabáu pa depués espublizalo per internet. Dende la organización piden a la xente que faiga d'actor improvisáu y que seyan una de les persones que señalen.