Rexach diz que la Fiscalía pue apoyar una querella contra Cascos

El presidente de l'Autoridá Portuaria de Xixón mostróse "satisfechu" pola decisión de la Fiscalía d'archivar la denuncia sobre los posibles delitos polos sobrecostos d'El Musel.

Rexach indicó que la decisión xudicial apoya una posible querella contra l'ex ministru asturianu Francisco Álvarez Cascos, por comparar el casu col del 'Palma Arena'. Nesti sen, Fernando Menéndez Rexach esplicó en rueda de prensa na sede portuaria, que nesti momentu tán verificando la trescripción de la grabación radiofónica na que supuestamente Cascos fizo eses declaraciones, pa estudiar que lo apaecío nos medios se correspuende colo espresao pol ex ministru.
  
De ser asina, apuntó que se procederá d'igual manera que col vicesecretariu de Comunicación del PP, Esteban González Pons, que tres manifestase nel mesmu sen nun programa de televisión, interpúnxose-y una papeleta de conciliación y, darréu, una querella criminal por inxuries por nun rectificar les sos palabres.
  
Sobre esta última, señaló que'l procesu sigue abiertu y refugó qu'haya "dos vares de midir", con alusión al casu 'Palma Arena' en comparanza col archivu de la Fiscalía de los sobrecostos d'El Musel.
  
Coles mesmes, calcó en que na denuncia presentada pol ciudadanu español pero residente en Luxemburgo, Ramón García Rodríguez, interpuesta'l 15 de setiembre del 2009, la Fiscalía archivó la causa n'esaminando "exhaustivamente" tol espediente y nun atopó "nengún tipu de delitu de nenguna índole".
  
Tamién, al so xuiciu, demuestra la "absoluta llegalidá" de la tramitación de les obres y del modificáu de les mesmes. Una llegalidá que, según él, yá taba refrendada pela vía alministrativa y agora tamién pola xudicial.
  
La denuncia presentóse a nivel particular contra'l mesmu Rexach y el direutor del Puertu, José Luis Díaz Rato y cualquier otru que pudiera resultar responsable de posibles infracciones, prevaricaciones, malversaciones, estafes o apropiaciones indebíes que pudieren cometese de resultes de les obres d'ampliación, en produciéndose unos sobrecostos de 216,31 millones d'euros, esto ye, un 43 por cientu más de lo presupuestao primeramente.
  
Tres l'análisis de la documentación, la Fiscalía reflexa que nenguna de les actuaciones encaxa nos tipos delictivos que'l denunciante señala nel so escritu. Ye más, afirma que'l cambiu del contratu realizáu'l 18 d'avientu del 2007 mandóse "puramente" pola normativa vixente n'España, amás de contar con informes favorables del Gobiernu Central.
  
Con too, la Fiscalía reconoz que'l proyeutu del superpuertu conlleva una gran dificultá técnica, que derivó en sobrecostos, según l'Autoridá Portuaria, derivaos de la subida de preciu de los materiales procedentes de canteres, de delles meyores técniques y de foles inusuales que causaron prexuicios a les obres.
  
Por too ello, Rexach resaltó que la denuncia "nun tien nengún fundamentu". Sicasí, apuntó que ye posible que puean presentase más denuncies sobre los sobrecostos, anque matizó que de momentu nun tienen constancia d'ello.