El Govern convida a los rumanos a aprender catalán pa prosperar

|

La conseyera d'Acción Social y Ciudadanía de la Generalitat, Carmen Capdevila, encamentó güei a los rumanos de Cataluña qu'aprendan catalán pa prosperar socialmente.

Asina lo dixo na presentación de la guía 'Vivir en Catalunya. Aprendamos catalán dende'l rumanu', promovida pola Secretaría pola Inmigración y la de Política Llingüística del Govern.
  
En rueda de prensa, la conseyera afirmó qu'esta guía de autoaprendizaxe del catalán tien por oxetivu garantizar la cohesión y ufiertar un ascensor social pa los inmigrantes rumanos. Falar catalán "va aumentar la so autonomía na vida cotidiana y va ampliar les sos relaciones sociales y oportunidaes llaborales", esplicó.
  
Destacó que los rumanos son el segundu coleutivu d'inmigrantes en Catalunya, y que'l so númberu casi se dobló en cuatro años, al pasar de 51.000 persones nel 2006 a 98.342 empadronaos en xunetu del 2009, pola entrada de Rumanía na Unión Europea nel 2007. Son ún de los grupos que meyor tán aguantando la crisis, dixo, y apuntó que se trata d'una población moza con una bona inserción llaboral.
  
El vicepresidente de la Generalitat, Josep-Lluís Carod-Rovira, sorrayó qu'aprender catalán "nun ye un caprichu cultural", sinón que ye indispensable p'ameyorar les oportunidaes de trabayu y pa evitar resquiebres sociales.
  
"Pocos países de la UE tán tan comprometíos cola xestión de la diversidá como Catalunya", aseguró Carod, y recordó qu'hai diez años tan sólo acoyía a 588 rumanos. Coles mesmes, remarcó que tanto'l rumanu como'l catalán son llingües romances y que tienen 1.500 palabres hermanes, lo que facilita'l so deprendimientu.
  
Los 10.000 exemplares de la guía, qu'inclúi un CD cola locución de los conteníos y diálogos del llibru, van distribuyise de forma gratuita ente les entidaes y axentes que tán en contacto con rumanos, según al Consorciu per la Normalització Llingüística, biblioteques públiques y escueles.
  
El Govern ta acabando tamién una guía en bereber y otra n'urdu, que se van sumar a les yá esistentes n'árabe y chinu. La colección enmárcase nel Pactu Nacional pola Inmigración de Cataluña y nel Plan de Ciudadanía y Inmigración 2009-2012.
 

Contador Estadistiques