12.000 asturianos emigraos en 2008 con Madrid como destín “favoritu”

En 2008 salieron d’Asturies 12.342 persones, y vinieron 21.438, lo que representa un saldu migratoriu positivu de 9.096 persones, según datos del Institutu Asturianu d’Estadística.

Los porcentaxes tán recoyíos na publicación Movimientos Migratorios n'Asturies 2008, promovida pol IAE, y onde se presenten los resultaos d'una operación estadística que forma parte del Plan Asturianu d'Estadística 2009-2012.
 
Nel estudiu pue vese qu’Asturies vien rexistrando, dende l'añu 2000, un saldu migratoriu positivu d'intensidá variable en función sobremanera de l'aportación que representen cada añu les inmigraciones procedentes d'otros países.
 
Les emigraciones menguaron en 2008 (12.342 salíes globales, que representen un descensu del 12,5% al respeutive de 2007). La presencia de persones de nacionalidá española ye mayoritaria ente los que marcharon d’Asturies (79,3%).
 
El destín más frecuente de los qu'emigraron dende Asturies foi'l territoriu estatal (81,2%), quedando’l 18,8% de les emigraciones restantes a salíes haza fuera del Estáu. La Comunidá Autónoma que más emigrantes d'Asturies acueye ye Madrid (21,8%), siguida de Castiella y Lleón (13,7%) y Galicia (10,7%).
 
Les emigraciones haza l'estranxeru, 2.325 en númberos absolutos, representaron el 18,8% de la emigraciones totales. D'elles, el 29,9% correspondieron a ciudadanos de nacionalidá española, y el 70,1% restante a ciudadanos estranxeros.
 
Del total de les emigraciones por asturianos al estranxeru, el 47,8% empobináronse principalmente haza países europeos. América acoyó al 43,1%. El restu (9,1%) distribuyóse ente países d'África, Asía y Oceanía.
 
Los movimientos migratorios totales rexistraos n'Asturies mientres 2008 menguaron un 6,6% con respeuto al añu anterior, atayando l'enclín creciente que veníen amosando dende 2001. Les migraciones internes cayeron el 3,0%, les inmigraciones el 5,9% y les emigraciones el 12,5%.
 
El coleutivu de población adulta (con edaes ente 15-64 años) ye'l que rexistró mayor actividá migratoria, algamando'l 80,1% de los movimientos totales en 2008.
 
Inmigrantes
 
De les inmigraciones correspondientes a ciudadanos non españoles, les más cuantioses proceden del continente americanu, que la so aportación en 2008 supunxo'l 49,7% de tola inmigración estranxera. L'aportación conxunta de Brasil, Colombia, Paraguai y Ecuador asitióse nel 28,9% de la inmigración total d'estranxeros.
 
Les inmigraciones procedentes de países de la Unión Europea, África, América del Norte, Asia y Oceanía tán formaes mayoritariamente por homes, mientres que predominen les muyeres nes orixinaries de países de la Europa non comunitaria, América Central y Caribe y América del Sur.
 
El númberu conxuntu d'entraes rexistraes n'Asturies en 2008 foi de 21.438, lo que representa'l 41,0% de toles migraciones habíes nel añu. Al respeutive de 2007 les inmigraciones esternes rexistraron globalmente un retrocesu del 5,9%.