Haidar pide la intervención de Van Rompuy

|

Aminetu Haidar, unvió una carta al presidente permanente del Conseyu Européu, Herman Van Rompuy, na que-y pide qu'intervenga de forma "urxente" nel conflictu saḥaraui.

Haidar pidió algamar que Marruecos cumpla les esixencies de la Unión Europea en materia de Derechos Humanos y asina evitar la muerte de siete "presos de concencia" saḥaraui  que caltienen una fuelga de fame dende'l pasáu 18 de marzu "pa reivindicar un xuiciu equitativu o la so lliberación inmediata" y la so situación ye "alarmante", alvirtió Haidar. Estos siete defensores de los Derechos Humanos tán deteníos na cárcel de Sal (Marruecos) a la espera d'un xuiciu militar por visitar los campamentos de refuxaos de Tinduf (Arxelia).
  
Ali Salem Tamek, Brahim Dahane, Hammadi Enanssiri, Saleh Lebbaihi, Rashid Sghayer y Yahdih Etarouzi, deteníos el pasáu mes d'ochobre, viven dende entós en "unes condiciones de encarcelación indignes". Amás, dixo, "el Gobiernu marroquín sigue prollongando la so detención cuando la instrucción xudicial tendría d'acabar hai yá dos meses".
  
L'activista llamó l'atención sobre'l fechu de qu'otru grupu de defensores saḥarauis de los Derechos Humanos visitaron recientemente los campamentos de refuxaos y, al contrario que los seis presos en fuelga de fame, nun fueron oxetu d'una "detención arbitraria". "Esto demuestra la falta de conteníu de les acusaciones feches contra los seis deteníos", acabó.
  
"Solicito (...) la so intervención urxente pa facer que Marruecos respete l'aplicación de les clauses esixíes pola Unión Europea no referente al respetu a los Derechos Humanos y reafitaes por usté mientres el conceyu (UE-Marruecos) de Granada", celebráu'l mes pasáu, dixo Haidar a Van Rompuy.
  
"Trátase d'evitar, lo más urxentemente posible, un desenllaz tráxicu pa los seis defensores saḥarauis de los Derechos Humanos deteníos en Sal", aportunó. D'esta manera, añadió, "usté confirmaría la voluntá de la Unión Europea de facer respetar les llibertaes fundamentales y contribuyiría a la lliberación de los presos políticos saḥaraui ". Coles mesmes, "ayudaría a la consecución d'una solución xusta y igualitaria que garantice l'exerciciu, per parte del pueblu saḥaraui , del so derechu a l'autodeterminación", manifestó.
 
Posible masacre
  
Per otru llau, Haidar declaró esti miércoles, según un comunicáu unviáu por ella mesma, que teme que nel Saḥara Occidental se produza "una masacre semeyante a la de Timor Oriental". La nota diz que'l martes, más de 3.000 "colonos" (marroquís que viven en territoriu saḥaraui ) acudieron "en masa" al aeropuertu de L'Ayún y "agredieron violentamente" a los 12 activistes que llegaren a la capital del Saḥara Occidental provenientes de los campamentos de refuxaos de Tinduf.
  
Según les organizaciones pacifistes saḥarauis presentes en L'Ayún, los marroquís faltaron y pegaron a los activistes, estrozando'l coche de los colegues qu'acudieron a recoyelos. Ente ellos taben Mohamed Dadach, el presu de concencia que más tiempu tuvo en prisión depués de Mandela, y Sultana Jaya, la moza que perdió un güeyu por cuenta d'una agresión de la Policía marroquí", precisa'l comunicáu.
  
Les organizaciones añadieron que tamién sufieron agresiones la muyer y los fíos pequeños de Dadach y Ghalia Djimi, vicepresidenta de l'Asociación Saḥaraui  de Víctimes de Graves Violaciones de los Derechos Humanos cometíes pol Estáu marroquí (ASVDH), y que too asocedió ante la presencia de "un gran númberu" de policíes marroquís que nun ficieron "nada pa torgar l'agresión".
  
Haidar calcó en que "los saḥarauis nun tienen nada en contra del pueblu marroquí, pero'l so Gobiernu quier utilizalo nesti conflictu y ta afalando a los colonos pa qu'agredan a la población saḥaraui que vive so la ocupación".
  
"Esto ye bien grave y pue provocar una gran masacre nel Saḥara Occidental semeyante a la de Timor Oriental", previno l'activista. Al so xuiciu, "en cuenta de responder a les reivindicaciones xustes de los presos de concencia que lleven más de vente díes en fuelga de fame, les autoridaes marroquís tán utilizando a los colonos pa esterminar a la población saharaui".
  
Mientres la so reciente visita a Estaos Uníos, a onde la convidó'l Centru Kennedy, Haidar alvirtió al Departamentu d'Estáu norteamericanu y a los miembros del Conseyu de Seguridá de la ONU de que la nueva estratexa del réxime marroquí ye más grave que l'anterior y qu'hai que buscar una solución inmediata pa evitar una masacre.
 

Comentarios

Yo soi firme partidariu de la Independencia del Sah.ara, pero Marruecos tien garrada polos güevos la subsistencia diaria de miles de families de pescadores, y eso los políticos tienen que decilo.

Gabis

Contador Estadistiques