L’arzobispu d’Uviéu, Jesús Sanz Montes, agradeció la felicitación del Bloque por Asturies pol so usu de l’asturianu y dixo que va tener en cuenta los pidimientos sobre la llingua.

"Santina de Cuadonga, ayúdamos nel camín pa llegar al to fíu; préstame tanto llegar hasta  vosotros" foron les pallabres que l’Arzobispu dixo n’asturianu na so toma de posesión, el pasáu 30 de xineru.
 
Nel mes de febreru’l Bloque por Asturies escribió una carta a Monseñor Montes onde-y agradecíen l’esfuerzu d’una persona “que naciendo fuera d’Asturies y nun teniendo’l nuestru idioma como llingua materna, demostró que la intención de ser respetuosu y facer por integrase ta penriba del sitiu de nacencia de cualquier persona”.
 
Pal Bloque, el xestu l´Arzobispu dio una lleición a una parte de la clase política, económica y social “que s’acomplexa a la hora de falar n’asturianu”. Según la organización, “tamién esperábemos qu’esto nun quedara nun detalle simbólicu y fuera’l primer pasu d’un cambiu que lleve al idioma asturianu a la normalidá total dientro de la ilesia Católica nel nuestru país, Asturies”.
 
Agora, l’Arzobispu d’Uviéu vien d’agradecer la felicitación del Secretariu Xeneral del Bloque por Asturies y diputáu Roberto Colunga por usar la llingua asturiana na so toma de posesión y dixo que tendrá en cuenta lo que-y averó sobre l’asturianu y la traducción de los llibros llitúrxicos.