El PAS convoca una concentración pa recordar a Isidro del Río

El Partíu Asturianista y Xuventú Asturianista entamen esti sábadu, 10 d'abril, un homenaxe a la figura d'Isidro del Río, primer alcalde de la II República en Xixón.

La organización entiende que la ideoloxía federalista, autonomista y asturianista del Partíu Federal Asturianu debe ser recuperada y reconocida, “y más cuando estes cuestiones polítiques nun son asumíes por nengún de los trés partíos políticos representaos nel Conceyu y na Xunta Xeneral”.
 
Según señalen dende la organización, “tamos nuna comunidá onde l'autonomía política ye mínima, onde les esmoliciones pola situación de Asturies ta supeditada a les ordénes que da la cúpula de cada partíu dende Madrid, onde la defensa de toles sos señes d'identidá ye nula per parte de el que nos gobiernen”. Poro, convoquen esta concentración pa denunciar la “des-memoria histórica” y pidir la reconocencia pa Isidro del Rio per parte del Gobiernu Municipal PSOE-IU.
 
L'actu va realizase na Plaza Mayor de Xixón el próximu 10 d'abril a les 12:00 hores de la mañana, y ta abiertu a tolos ciudadanos. Nel mesmu van participar miembros destacaos del PAS y de la Xuventú Asturianista.