Tolo d'Asturies va tar en Llangréu

Yá ta zarráu'l programa del festival Tolo d’Asturies, que va celebrase en Llangréu ente’l 6 y el 9 de mayu, enllenando’l conceyu de música, tradición, artesanía y llingua asturiana.

La inauguración oficial del festival ye’l xueves 6 de mayu, a les 19.30 hores na Casa de los Alberti, cola presentación de los cursos d’acurdión y el primer conciertu, a cargu d’Ignacio Alfayé, Cyrille Brotto y Xuan Nel Expósito. Mientres que’l vienres 7 a les 20.30 hores, nel Teatru Nuevu de La Felguera sigue la música col conciertu ‘La muyer tien voz’, de la mano d’Espido y Mapi Quintana
 
Yá nel Recintu Ferial Estación d’Autobuses de Llangréu, entamen les actividaes del sábadu 8. Asina, a les 12 hores, va producise l’apertura de la Feria d’artesanía y gastronomía y de la III Feria del discu y el llibru n’asturianu. Darréu vendrá un conciertu de la Banda de Gaites Conceyu de Llangréu.
 
A les 13.15 hores tomara’l relevu la cantante Tina Gutiérrez, mientres qu’a les 21 hores vendrá’l gran conciertu del día de la mano de Duerna, Dixebra, IMG y Felpeyu + Frigg, qu’ufrirán un espectáculu diseñáu a costa fecha pa Tolo d’Asturies.
 
El domingu 9 mayu, otra vuelta nel recintu ferial Estación d’autobuses de Llangréu, la música va entamar a les 12.30 cola Banda de Gaites la Salle, darréu vendrá un conciertu de tonada a cargu de los Hermanos Valle Roso, Raúl Díaz García, Francisco José Fernández Fernández y Mari Celi Fernández Palacio. Mientres qu’a les 17.30 hores será’l turnu pa la música de Jerónimo Granda.
 
A les 19 hores, un homenaxe a la gaita va poner pieslle al festival Tolo d’Asturies. Trátase d’un espectáculu diseñáu a costa fecha pal festival coordináu por Xuan Nel Expósito, onde van participar Ramón García Morán (teclaos), Rubén Álvarez (guitarra), Horacio García (baxu y contrabaxu), Chus Castro (batería), Andrés Fernández (gaita), Pablo Carrera (gaita), Chus Solís (gaita), Dani García Argüelles (gaita), Nacho Cuetos (gaita), Adrián Muñiz (gaita) y Andrea F. Joglar (gaita).