Fred Bougouin-Kramer pon un cursín d'harpa céltica en Xixón

El fin de selmana del 17 y 18 d’abril del 2010, celebraráse nel Muséu del Publu d’Asturies de Xixón un cursín d’harpa céltica a cargu del harpista francés Fred Bougouin-Kramer.

Pal cursín nun fai falta tener conocimientos previos y desendolcaráse el sábadu día 17, de 15 a 20 hores, y el domingu 18, de 11 a 15. Esta actividá complementaráse con un conciertu de Fred Bougouin na nueche del sábadu día 17 d’abril, sobre les 21,30 hores, na tabierna Cuévano, en La Pola Siero, allugada na plaza Les Campes, na salía pela antigua carretera a Xixón, que tará abiertu a tolos públicos y nel que collaborarán los músicos asturianos Dani García de la Cuesta y Pedro P. Sanjurjo, miembros del grupu Zapica. Tamién se fará una visita guiá pel Muséu Etnográficu Pueblu d’Asturies y el Muséu la gaita, allugáu nel mesmu llugar.
 
Les persones interesaes en dir al cursín, que tien un coste de 30 euros, tienen de ponese en contautu cola organización al traviés del corréu dagarcues@yahoo.es o’l teléfonu 626511863, onde facilitarán tola información complementaria sobre esti eventu. Aquelles persones que nun tengan instrumentu tendrán de comunicalo nel intre d’apautase, pa, na midía les posibilidaes de la organización, apurri-y ún.
 
Fred Bougouin ñació en Poitiers en 1967 y entama los sos estudios d’harpa a los 6 años, averándose bien ceo al usu de l’harpa céltica, y al gustu pola composición, les igües y la música electroacústica. Dende entós, trabaya en delles formaciones y collaboró con otros harpistes n’actividaes como los Rencontres Internationales de Harpe Celtique de Dinan, xuntu a Janet Harbison, Katrien Delavier o Myrdhin. Nestos alcuentros, gana’l primer premiu d’improvisación nel añu 1993, y el segundu de composición nel 1994.
 
El so pruyimientu llévalu a desendolcar una nueva téunica na qu’interpreta nel instrumentu tocando con uñes llargues na mandrecha y curties na manzorga. Participa en diferentes grupos y estilos musicales, medieval, renacentista, reggae, pop-rock, suramericano, y sobre tou, célticu, con más de 1000 conciertos n’Europa, dándo-y una nueva visión al usu del instrumentu.
 
Frédéric Bougouin-Kramer, toca con harpes céltiques de la casa musical CAMAC, con cuerdes metáliques y de nailon. Fue cofundador de l’asociación L’Herbe D’Or, compositor miembru de la SACEM, participó na produción de 11 cds y en munches grabaciones como invitáu, como col grupu Solstice, con Chris Dawson y el grupu Keltiac, y la participación con Mike Mac Goldrick, Sylvain Barou, Alain genty, Annie Ebrel y Dan ar Braz, y equí n’Asturies, nel trabayu caberu del grupu La Bandina.